Unha colisión múltiple rexistrada na mañá deste xoves no concello de Brión provocou tres persoas feridas, segundo informou o 112. O sinistro produciuse arredor das 8:50 horas no quilómetro 12 da CG-1.5, na parroquia dos Ánxeles, cando dous camións que transportaban aluminio e un turismo impactaron entre si.
No primeiro aviso alertouse da posibilidade de persoas atrapadas e mesmo dun dos implicados inconsciente. Con todo, ao chegar os equipos de emerxencias confirmouse que ningún dos ocupantes permanecía no interior dos vehículos, aínda que un dos camións acabou envorcado na estrada.
Os servizos sanitarios atenderon ás tres persoas feridas, dúas delas trasladadas en ambulancia e unha evacuada en helicóptero medicalizado ao Hospital Clínico Universitario de Santiago (CHUS).
A Garda Civil de Tráfico mantén a circulación cortada mentres continúan os traballos de retirada dos vehículos e limpeza da vía. No operativo interveñen efectivos do 061, Bombeiros de Santa Comba, GES de Brión, Policía Local e persoal de mantemento de estrada.
