O Centro de Linguas Modernas (CLM) da Universidade de Santiago de Compostela abriu este mércores 1 de outubro o prazo de inscrición para as súas Conversas en inglés, francés e checo, dirixidas tanto a persoas da comunidade universitaria como a público externo, con tarifas diferenciadas segundo o caso. A matrícula permanecerá aberta ata o 20 de outubro, prazo no que tamén se poderá realizar o test de nivel previo en caso de ser necesario.
As conversas están dispoñibles nos niveis intermedio e avanzado e desenvolveranse dende finais de outubro ata mediados de decembro no caso do inglés e do checo, e ata xaneiro no caso do francés.
DIPLOMA DE COÑECEMENTOS DE FRANCÉS
Ademais, o CLM abriu tamén este mércores o período de matrícula para os exames oficiais DELF (Diplôme d’études en langue française), correspondentes aos niveis B1 e B2. Trátase da certificación internacional en lingua francesa expedida polo Ministerio de Educación Nacional de Francia, segundo o Marco Común Europeo de Referencia para as Linguas.
O diploma DELF, que non ten data de caducidade, acredita de forma permanente o nivel de competencia en francés e facilita o acceso a estudos universitarios na francofonía, ademais de ser válido para a solicitude de bolsas Erasmus, que esixen un nivel B1 ou B2 segundo os requisitos da universidade de destino.
O CLM da USC, centro colaborador da Alliance Française dende 2020, organiza estas probas para os campus de Lugo e Santiago. No mes de xuño deste ano xa se celebraron exames en ambas sedes, e nesta convocatoria de outubro repítese a oferta para o alumnado interesado.
