A alcaldesa de Santiago, Goretti Sanmartín, insistiu este martes en que “non existe ningún criterio nin ningunha condición” pola que haxa que suspender a aplicación da taxa turística na capital galega e asegurou que “o proceso segue adiante”. Ante as preguntas dos medios, a rexedora compostelá mostrouse confiada de que este mércores empece a aplicarse este imposto de estancias turísticas.
Cómpre lembrar que a portavoz do goberno local de Santiago, Míriam Louzao, confirmou este luns que o Concello presentou as súas alegacións ao recurso exposto pola Unión Hoteleira Compostela á chamada taxa turística. Neste sentido, sinalou que “non concorren os requisitos para a súa suspensión” e que, por tanto, “non hai ningunha cuestión que evite que este mércores entre en vigor”.
Do mesmo xeito pronunciouse este martes a alcaldesa, que insistiu en que, en principio, o prazo que manexa o Concello de Santiago é que o 1 de outubro empece a aplicarse “con toda normalidade”. “En todo caso, como sabemos, hai un recurso xudicial dunha parte do sector hoteleiro e, unha vez que se resolva e que os xulgados decidan se hai medidas cautelares ou non, iso podería modificar a situación”, concluíu Sanmartín.
