A voceira municipal, Míriam Louzao, informou este luns dos principais acordos adoptados pola Xunta de Goberno local. Entre eles destaca a concesión definitiva de tres subvencións por un total de 185.668,32 euros para obras de rehabilitación na zona de rehabilitación integral de Vista Alegre, correspondentes á convocatoria de 2022. Os inmobles beneficiados están situados na Avenida de Castelao, 2 (9.659,21 €), na rúa do Bispo Diego Peláez, 7 (76.163,16 €) e na rúa de Santa Uxía de Ribeira, 4 (99.845,95 €).
Tamén se aprobaron catro licenzas de obra maior: a construción dunha nave de produtos hortofrutícolas na rúa de Castela León, no Polígono da Sionlla; a rehabilitación dunha vivenda en Angrois; a reforma interior dun piso na rúa dos Basquiños; e a instalación dun sistema de illamento térmico nun edificio da Carballeira de San Lourenzo. Ademais, o Concello presentaráse nun procedemento xudicial promovido contra a cancelación dunha vivenda de uso turístico en Tras Salomé.
No ámbito da contratación pública, a Xunta de Goberno deu luz verde á licitación do mobiliario do Centro Integral para a Inclusión Social (CIPIS), cun orzamento base de 48.396 euros (IVE incluído), repartido en tres lotes. Aprobouse igualmente o expediente do contrato mixto para a Cabalgata de Reis, cunha dotación total de 435.807,54 € repartida entre a produción artística do evento (330.817,46 €) e o alugueiro de carrozas (104.990,08 €).
Outro dos acordos foi o contrato de subministración de gas para calefacción das dependencias municipais, cun límite de gasto de 136.500 €, así como a adxudicación do seguro da flota municipal á empresa Occident GCO Sociedad Anónima de Seguros y Reaseguros, cunha prima de 27.843,05 €. Paralelamente, autorizouse a contratación dun préstamo a longo prazo de 2,5 millóns de euros para financiar investimentos previstos nos orzamentos de 2025.
No capítulo de convenios, o Concello apoiará con 3.000 € á Xunta de Confrarías da Semana Santa, con 20.000 € á USC para a Feira de Emprendedoras da Comarca de Compostela, e con outros 20.000 € á FANPA Compostela, que destinará parte da achega a poñer en marcha o novo servizo de comedores escolares nas unitarias rurais do Gaioso (O Eixo), Rial (Laraño) e Bispo Teodomiro (Marrozos). “Entendemos que esta medida é unha importante axuda para as familias e contribúe a que estes centros continúen cheos de vida”, destacou Louzao.
Así mesmo, ampliouse ata o 31 de outubro o prazo para xustificar as subvencións concedidas ás asociacións veciñais para programas de interese xeral en 2025.
Finalmente, a portavoz confirmou que o Concello presentou alegacións ao recurso contra a ordenanza do imposto ás estadías turísticas, insistindo en que “non concorren os requisitos para a suspensión” e que nada impide a súa entrada en vigor este mércores.
