A Casa da Cultura do Milladoiro acolleu unha xornada de debate sobre a crise habitacional, na que participaron María José Piñeira Mantiñán (docente e investigadora do IDEGA), Carlos Alberto García Novio (avogado especialista en urbanismo), Iago Lestegás Tizón (concelleiro de urbanismo, vivenda e cidade histórica de Santiago de Compostela), José Antonio Abelenda Vila (secretario da Plataforma Sol Naciente) e Escarlata Pampín López (voceira municipal do BNG de Ames). O encontro, moderado por Manel Pardo, puxo enriba da mesa algúns dos principais retos en materia de vivenda.
Na sesión analizouse como, malia teren pasado 18 anos desde a burbulla inmobiliaria, a situación non mellorou, senón que mudou. Segundo se expuxo, a presión e especulación xa non se concentra tanto na compra-venda como no mercado de alugueiro, cun impacto directo sobre a poboación nova e traballadora que busca un fogar digno.
Tamén se salientou o abandono histórico de barrios e contornos como o Milladoiro, subliñando a importancia de evitar estigmatizacións mediante a organización de actividades e eventos que reforcen o tecido social e comunitario.
No plano urbanístico, os participantes defenderon a necesidade de actuar sobre o espazo público como ferramenta de transformación. Entre as medidas citadas figuraron a reducción de carrís de tráfico, a ampliación de beirarrúas, a introdución de máis zonas verdes e a colocación de novo mobiliario urbano que permita revitalizar rúas e prazas sen modificar o construído.
A voceira do BNG de Ames, Escarlata Pampín, insistiu en que o problema da vivenda debe recoñecerse como un dos máis graves do país. “Seguiremos traballando firmemente, en Ames e en todo o país, sendo conscientes de que hoxe vivimos unha das peores crises de acceso á vivenda, convertida ademais no maior mecanismo de desigualdade social porque aumenta a brecha entre as persoas que menos teñen e as que dispoñen de máis patrimonio. Queremos un fogar digno para tódolos galegos e galegas”, concluíu.
