Máis de 23.000 persoas que recolleron a Compostela en Santiago decidiron proseguir a súa ruta ata os finais de Muxía ou Fisterra entre o 1 de agosto e o 21 de setembro. Así o informou este sábado o director de Turismo de Galicia, Xosé Merelles, quen presentou os primeiros resultados dos sensores instalados no Camiño de Fisterra-Muxía.
Segundo os datos recollidos, en agosto chegaron a estes dous puntos 14.369 peregrinos, mentres que do 1 ao 21 de setembro a cifra foi de 8.827. Os dispositivos, colocados ao longo da ruta en Negreira, Dumbría, Muxía e Fisterra, permiten diferenciar entre visitantes ocasionais e persoas que realizan o percorrido como prolongación do Camiño.
As estatísticas amosan que arredor do 30% dos visitantes de Fisterra nestes meses eran peregrinos, fronte a un 8% en Muxía. A media diaria de camiñantes foi de 130 en Muxía e de 300 en Fisterra, con rexistros que alcanzaron os 400 peregrinos nun día nalgún dos dous destinos.
Merelles subliñou que a Xunta está a desenvolver un “importante esforzo instalando todos estes sensores en todos os camiños oficiais da ruta xacobea” e engadiu que tamén se monitorizan outros puntos de interese turístico como a praia das Catedrais ou o Parque Nacional Marítimo Terrestre das Illas Atlánticas. Ademais, avanzou que se realizará un estudo específico sobre os fluxos de visitantes no Castro de Baroña.
