O Colexio Maior La Estila de Santiago constituíuse como fundación de interese galego para continuar coa súa actividade como centro unicamente masculino, tras a entrada en vigor da Lei Orgánica do Sistema Universitario (LOSU) de 2023, que prohibe a segregación por sexos nos colexios maiores adscritos a universidades públicas.
Segundo se recolleu nunha noticia en El Correo Gallego, o centro, que leva sete décadas vinculado á Universidade de Santiago, viuse obrigado a romper ese lazo institucional. “A nós gustaríanos seguir como antes, pero a lei española prohibiu que os colexios maiores non mixtos poidan estar adscritos a universidades públicas”, sinalaron fontes do colexio maior ao citado medio.
A constitución da fundación, recentemente publicada no Diario Oficial de Galicia, garante seguridade xurídica e permite manter o funcionamento habitual do colexio, que ofrece residencia e alimentación a estudantes universitarios nun marco formativo integral. O padroado inicial está formado por Gonzalo Eduardo Cortizo Ameal como presidente, Luis Trincado Boville como vicepresidente, Gerardo Gándara Moure como vocal e Juan Vicente González Boo como secretario.
No mesmo contexto, outros colexios maiores composteláns non mixtos, como Arosa e María Inmaculada, ambos femininos, deberán adaptarse á normativa e converterse en mixtos ou ben atopar alternativas legais semellantes.
