A maxistrada Ana López Suevos decretou o sobresemento provisional da causa aberta polo coñecido caso Desproi respecto do exalcalde Xosé Sánchez Bugallo e a súa xunta de goberno, ao considerar que non hai indicios de prevaricación nin de tráfico de influencias. A investigación mantense unicamente contra o exconcelleiro de Medio Rural José Manuel Pichel, imputado por un posible delito de participación en negociacións prohibidas.
A resolución, con data do 25 de setembro, coincide coa xornada na que Bugallo acudiu ao xulgado para declarar como testemuña. O procedemento, que será elevado ao Tribunal do Xurado, seguirá só contra Pichel. A xuíza subliña que “as irregularidades detectadas no expediente administrativo carecen da gravidade suficiente como para consideralas constitutivas dun delito de prevaricación” e descarta manter na causa a Bugallo e aos concelleiros Milagres Castro, Gumersindo Guinarte, Mercedes Rosón, Gonzalo Muíños, Marta Abal, Esther Pedrosa e José Luís Fernández, así como á propia empresa Desproi Promocións SL.
O caso remóntase a 2021, cando Pichel formaba parte do goberno socialista presidido por Bugallo. A entón concellaría de Medio Rural trasladou as súas oficinas ao polígono de Costa Vella, nunha nave arrendada a Desproi, compañía da que Pichel era socio a través da mercantil Gaia. O edil presentou a súa dimisión tras revelarse a súa vinculación coa empresa. Máis tarde recoñeceu ter cometido un “erro considerable” por non informar da súa participación societaria ao alcalde nin á xunta de goberno, aínda que asegurou que actuou “sen mala fe”.
A denuncia que deu inicio ao proceso fora presentada polo PP de Santiago, dirixida inicialmente contra todos os membros do executivo local.
En relación coa decisión xudicial, a actual alcaldesa, Goretti Sanmartín, foi consultada este sábado pero evitou facer unha valoración ao indicar que aínda non recibiu a resolución. “Eu creo na xustiza e cando fala, o resto da xente o que temos que facer é acatar esas sentenzas”, declarou.
