O Concello de Santiago aplicará unha recarga de entre o 50% e o 150% ao cobro do imposto de bens inmobles (IBI) a vivendas desocupadas –se cumpren varias condicións– tras a aprobación dunha modificación das ordenanzas reguladoras de ingresos públicos, co voto a favor de membros do goberno local (BNG e Compostela Aberta), PSOE e edilas non adscritas.
Esta recarga aplicarase naqueles casos en que manteñan esa condición durante dous ou máis anos e cuxa propiedade sexa titular de catro ou máis inmobles. Esta é unha das novidades que contempla a modificación aprobada, que tamén contén novas bonificacións ás vivenda de promoción pública, unha das categorías de vivenda protexida.
Para aplicar a recarga, o Concello terá que elaborar un censo dos inmobles desocupados con carácter permanente en Santiago, para o que se baseará en indicios dos consumos e do padrón de habitantes.
APOIO DE EDILAS NON ADSCRITAS E PSOE
En representación das edilas non adscritas, Mercedes Rosón trasladou o seu acordo con medidas a favor da solución da cuestión da vivenda e a mobilización do parque de vivendas desocupadas.
Con todo, puxo en dúbida o alcance “real” da medida, que prognosticou que será “limitado” e “sen efectos inmediatos” en base á limitación das competencias municipais neste ámbito. “Hai que ser conscientes de que as competencias en materia de vivenda é a Xunta de Galicia e, por tanto, calquera competencia local será limitada”, apuntou.
Pola súa banda, a edila socialista Marta Abal referendou, na súa intervención, o apoio da súa formación ás modificacións presentadas e cualificou como “interesantes” aquelas referentes ao ámbito urbanístico.
Neste sentido, introduciu un matiz: “Estando de acordo coa idea, non o estamos coas formas. Hai unha falta de diagnose da vivenda baleira en Santiago para poder acoutar a realidade”. Por iso, o PSOE presentou unha proposición dun censo de vivendas baleiras, que o pleno tratará máis adiante.
‘NON’ DO PP
Por outra banda, o portavoz popular, Borja Verea, considerou que o “debate político” desta modificación está, precisamente, no gravame ás vivendas desocupadas, en tanto que ve o resto de modificacións son apreciacións técnicas, nas que o PP non pon ningunha objección.
Si as pon en recárgaa a inmobles desocupados, polo que os seus 11 concelleiros votaron en contra dela. Verea defendeu un modelo baseado en “incentivar, promocionar e bonificar”, contrario ao de “castigar e subir impostos”, que, nas súas palabras, representa o do goberno local. Así, trouxo ao pleno propostas como a baixada de impostos a quen alugue a súa vivenda.
