Un home resultou ferido despois de que o vehículo no que circulaba pola estrada DP-6502, no municipio coruñés de Teo, chocase contra unha árbore. Os feitos, segundo informou o 112, sucederon pasadas as 00:00 na parroquia de Lampai. Nese momento, un particular alertou á central de emerxencias deste sinistro, sinalando que a persoa que viaxaba no interior do turismo era incapaz de saír do habitáculo.
Con estes datos, os operadores da central de emerxencias solicitaron a colaboración do 061, do GES de Padrón e da Garda Civil de Tráfico. Xa no lugar, os membros do GES confirmaron que o implicado estaba consciente, pero atrapado no vehículo. Así, detallaron que tiveron que empregar material de excarceración para retirar as portas e o maleteiro. A continuación, o ferido foi trasladado polos servizos sanitarios ao centro hospitalario de referencia.
