O International Students Welcome Day da Universidade de Santiago de Compostela celebrouse esta semana cunha ampla participación: arredor de 300 estudantes internacionais de case 50 países distintos déronse cita no acto de benvida que marca o inicio do curso académico.
O evento contou coa presenza do concelleiro de Urbanismo, Iago Lestegás, quen subliñou a relevancia do encontro para proxectar Compostela como cidade aberta ao diálogo intercultural. No seu discurso, o edil sinalou que “nun momento en que a democracia está en xogo en moitos lugares do mundo, nun momento en que Palestina e outros pobos sofren a brutalidade da destrución masiva, nun momento en que moitos queren inxectarnos medo e odio cara aos que son diferentes, necesitamos promover a diversidade, o intercambio e a solidariedade”.
Lestegás engadiu que as universidades e o estudantado internacional teñen un papel chave neste reto global, ao contribuír ao entendemento mutuo e á construción de sociedades máis xustas e plurais.
O Welcome Day forma parte do programa de acollida que a USC organiza cada ano co obxectivo de facilitar a adaptación do alumnado estranxeiro e promover o intercambio cultural na comunidade universitaria compostelá.
