A concelleira de Mocidade de Santiago, María Rozas, presentou a programación 2025-2026 do Centro Xove de Creación Cultural da Almáciga, unha oferta “ampla, variada e flexible” que se sustenta no novo contrato de xestión, cun orzamento anual un 50% superior ao anterior. Segundo explicou, este reforzo permite mellorar a carteira de actividades, ampliar os horarios e sumar servizos orientados á participación xuvenil e a un lecer saudable. “O Centro Xove debe ser un espazo de referencia para a mocidade de Santiago”, sinalou.
Acompañada polo técnico municipal Manuel Fernández e pola coordinadora do centro, María Alonso, Rozas avanzou que a grella anual inclúe unha vintena de propostas estables ás que se engadirán programacións trimestrais adaptadas ás demandas das persoas usuarias. O modelo mantén o enfoque participativo, vertebrado arredor do programa ‘Participa’, a través do cal máis da metade das actividades nacen de iniciativas de xente moza creadora, que recibe mentorización do persoal do centro para deseñar obxectivos, metodoloxías e execución. “Queremos que a mocidade sinta o centro como o seu propio espazo”, resumiu Alonso.
Entre as novidades, a Concellería destacou a aceleradora de proxectos musicais para as bandas residentes que ensaian nos locais da Almáciga. O itinerario contempla formación integral para abrirse paso na industria: modelo de negocio, dereitos de propiedade intelectual, escenografía, gravación en estudo ou vestiario. “É un programa ambicioso que continúa a profesionalización das bandas que pasan polo Centro Xove”, apuntou Rozas, quen lembrou que do espazo “saíron grupos hoxe punteiros en Galicia e fóra”.
A oferta musical complétase con cursos de iniciación á guitarra e técnica vocal, ademais de obradoiros noutros ámbitos de interese xuvenil: cómic, técnicas de ilustración, posta en marcha dun podcast, ioga, club de bordado e sendeirismo. No plano dixital, haberá pezas en liña sobre coidado de guitarras, preparación de videoclips e branding. Xunto ás actividades, o centro mantén servizos estables ligados aos locais de ensaio: formación en mantemento de instrumentos, mentorías, préstamo de material, e tamén préstamo de xogos de mesa, cineclube e club de lectura.
O bloque de sendeirismo inclúe saídas mensuais pola contorna de Santiago e outra saída mensual fóra do concello —un formato xa probado o curso pasado con alta demanda—, mentres que o curso de cociña consolídase como proposta socio-cultural para xerar rede e convivencia entre mozos e mozas. A inscrición está aberta desde o día 12 e pode formalizarse a través de www.centroxove.com e do correo info@centroxove.com. As actividades son de balde, co obxectivo de eliminar barreiras económicas no acceso.
Durante a quenda de preguntas, Rozas abordou a situación das bolsas municipais de material escolar, comedor e actividades extraescolares. Indicou que xa se publicou a resolución provisional, aberta a alegacións, e que a definitiva está pendente de fiscalización pola Intervención municipal. “A maior parte das familias xa saben se teñen bolsa”, dixo, precisando que os pagos se realizan tras a xustificación dos gastos: material escolar despois do 30 de setembro e comedor e extraescolares a finais de outubro. Engadiu que o procedemento non está fóra das datas habituais e que a área de Intervención arrastra unha sobrecarga de traballo por baixas médicas.
A concelleira tamén valorou o debate sobre o modelo de xestión do ciclo da auga. Afirmou que existe un borrador de informe que avalia diferentes modelos e que calquera decisión se adoptará con datos, na comisión na que participan todos os grupos municipais e posteriormente no Pleno. Con todo, lembrou a posición de Compostela Aberta: “Apostamos por recuperar o control público dun servizo esencial e por evitar hipotecas de 50 anos”, sostivo, citando como referencia experiencias noutros concellos, entre eles Valladolid ou Ames. “Non se trata só de fórmulas, senón de para que: investir os beneficios en infraestruturas e mellorar a calidade do servizo”, engadiu.
A programación do Centro Xove para 2025-2026, co foco en música, creación e participación, combinará actividades anuais e trimestrais e servizos permanentes, con marxe para incorporar novas propostas ao longo do curso en función das suxestións da propia mocidade. “Escoitar eses intereses e dar alternativas é a nosa obriga como administración”, concluíu Rozas.
