O Concello de Santiago de Compostela autorizou o ano pasado a construción de “máis do dobre” de vivendas en edificios de vivenda colectiva de nova construción respecto ao ano 2023, tal e como asegurou este luns o concelleiro de Urbanismo, Iago Lestegás. En concreto, en 2024 foron 189 vivendas deste tipo –89 vivendas de protección autonómica (VPA)–, mentres que en 2023 o total foi de 85 –sendo 32 vivendas de protección autonómica–.
Así o trasladou o edil nunha rolda de prensa na que debullou os datos do consistorio tras a celebración da reunión semanal do goberno local. Neste contexto, detallou que leste mesmo luns a xunta de goberno local concedeu máis 13 autorizacións, sendo en total 83 as licenzas para vivendas en edificios de nova construción –29 de protección autonómica–. “Como vedes, en 2024 autorizouse a construción de moitas máis vivendas en edificios de domicilio colectivo de nova construción que en 2023. E este ano, cando faltan aínda tres meses e medio para que termine 2025, xa autorizamos case tantas como en todo 2023”, valorou o concelleiro.
MÁIS VIVENDAS É “O CAMIÑO”
Neste contexto, o edil asegurou que é “necesario” ampliar a oferta de vivenda protexida na capital galega “a prezos alcanzables”, así mesmo, defendeu que “este é o camiño”. Así mesmo, presentou os datos relativos a vivendas unifamiliares, reformas e ampliacións en edificios existentes. Respecto de cubertas e fachadas para a mellora da eficiencia enerxética, precisou que se concedeu licenza de obra maior para mellorar a envolvente de cinco edificios.
BONIFICACIÓNS TRAS APROBACIÓN DE ORDENANZAS
Outro asunto abordado polo edil foi o aumento do Imposto sobre Bens Inmobles (IBI) a inmobles baleiros, que irá a votación no Pleno municipal. Segundo explicou Lestegás, unha vez aprobada a ordenanza, o Concello terá que elaborar un “censo dos inmobles de carácter permanente en Santiago”. En concreto, adiantou que o consistorio se baseará en indicios de consumo e no padrón de habitantes. Tamén avanzou que as bonificacións previstas na actual ordenanza para vivendas de protección autonómica estenderanse ás vivendas de promoción pública.
É dicir, “todas as vivendas protexidas terán unha bonificación do IBI dun 50 % nos tres primeiros anos e no caso das VPA será do 35 % nos dez anos seguintes, no caso das VPP será do 45 % nos dez anos seguintes”. Tamén no Imposto sobre Construcións, Instalacións e Obras (ICO) estenderase a bonificación dun 50 % da VPA á VPP. Ademais, as obras de especial interese ou de utilidade social terá ata un 95 % de redución.
