O secretario local do PSOE de Compostela, Aitor Bouza; xunto coa deputada no Parlamento de Galicia Patricia Iglesias e a concelleira Marta Abal denunciaron, en rolda de prensa, o inicio dun novo curso escolar “marcado, unha vez máis, pola falta de profesorado e de recursos para atender as necesidades da comunidade educativa”. Bouza advertiu que “Compostela está á marxe das cuestións prioritarias do Goberno galego” e esixiu ao presidente, Alfonso Rueda, que “se centre e que vexa que este inicio do curso escolar non pode ir en detrimento de as familias de Compostela”.
Na rolda de prensa, insistiu en que son os alumnos e alumnas os que “ven realmente prexudicados por esta política en contra da educación pública” que, segundo o socialista, “cada vez vai a máis por parte da Xunta de Rueda”. Bouza aproveitou para anunciar que o PSdeG de Santiago iniciará unha rolda de reunións con ANPAS e comunidades educativas para recoller todas as carencias e trasladalas ás institucións competentes. Así mesmo, anunciou que o grupo socialista levará ao pleno do Concello de Santiago unha moción para esixir á Xunta “máis recursos” e unha resposta “estable”. “Investir en mellorar a atención destas nenas e nenos é, desde logo, o mellor para a sociedade”, concluíu.
