Zahara, unha das artistas máis recoñecidas da escena musical española, protagonizará en Santiago de Compostela unha das citas destacadas do ciclo Momentos Alhambra Acustiquísimos deste 2025. O concerto terá lugar o sábado 22 de novembro, ás 21:30, no Patio de Cristal do San Francisco Hotel Monumento, un espazo singular no que a cantautora presentará un directo en formato acústico e íntimo.
As entradas para esta actuación sairán á venda mañá luns, 8 de setembro, a partir das 11:00 horas a través da plataforma Ataquilla.com.
No escenario compostelán, Zahara ofrecerá un espectáculo en solitario, acompañada unicamente das súas guitarras, pedais, piano e percusións. O concerto está concibido como unha experiencia inmersiva na que a artista alterna momentos de profunda intimidade con pasaxes máis épicas, logrando unha posta en escena técnicamente complexa e emocionalmente intensa.
O ciclo Momentos Alhambra Acustiquísimos, que celebra este ano a súa oitava edición, propón concertos de pequeno formato en espazos singulares de catro cidades galegas. A proposta destaca pola proximidade co público e a calidade sonora das actuacións, nas que tamén participa a gastronomía galega a través de tapas elaboradas por cociñeiros convidados.
