A Asociación Área Empresarial do Tambre (AAET) inaugurará mañá luns, 8 de setembro, unha mostra pictórica que reunirá o traballo de Juan Silva, Manuel Quiñoy e Manuel Blanco. O acto terá lugar ás 20:00 no Centro Empresarial do Tambre e contará coa presenza de representantes institucionais, entre eles o presidente do Parlamento de Galicia, Miguel Ángel Santalices, o delegado do Goberno en Galicia, Pedro Blanco, o bispo de Santiago, Francisco José Prieto, ou o secretario xeral adxunto da CEG, José Manuel Maceira. Tamén asistirá o pintor e presidente da Real Academia Galega de Belas Artes, Manuel Quintana Martelo, xunto con outras personalidades dos ámbitos político e cultural.
A exposición reúne máis de 50 obras, que abranguen estilos e técnicas moi diferentes. Juan Silva amosará 16 óleos e un carboncillo, na súa maioría retratos anónimos, xunto a figuras coñecidas como o alcalde de Málaga ou o rei de Marrocos, ademais de dous autorretratos. O autor, formado con mestres como Raúl Gil Burés ou Richard Schmid, presenta unha retrospectiva desde 1995 con obras figurativas elaboradas tanto alla prima como con veladuras.
Pola súa parte, Manuel Quiñoy, natural de Santiago, achega unha vintena de óleos nos que recrea vistas urbanas do casco histórico compostelán. O artista, autodidacta e inspirado por referentes como Velázquez, Vermeer ou Dalí, combina realismo e surrealismo, con algunhas pezas próximas ao hiperrealismo.
En canto a Manuel Blanco, tamén compostelán, exporá unha selección do seu traballo desenvolvido desde 2010. Inclúe pinturas luminosas nocturnas, pezas da serie Miradas diferentes exhibida no Parador dos Reis Católicos, así como pratos e cunchas decorados con motivos xacobeos. Entre eles destaca un prato de madeira co gravado da última sincronía do Códice Calixtino. O autor, que comezou a súa traxectoria nos anos 90 e é autodidacta, combina soportes diversos como tea, coiro, cerámica ou madeira.
A mostra permanecerá aberta ata o 25 de setembro, de luns a venres en horario de 9:00 a 14:00 e de 16:00 a 20:00. Recoméndase avisar previamente da visita no teléfono 981 55 28 50.
