O PSdeG-PSOE de Santiago considera que a alcaldesa da cidade, Goretti Sanmartín, “viviu de rendas” durante os dous primeiros anos de mandato, grazas a proxectos “en diversas fases de posta en marcha” polo anterior goberno, liderado polo socialista Xosé Sánchez Bugallo. Nunha rolda de prensa ofrecida este xoves, os dous concelleiros do grupo do PSOE, Gumersindo Guinarte e Marta Abal, puxeron o foco na “deficiente xestión” do Concello.
En concreto, referíronse á “baixa porcentaxe de execución” do plan de contratación de 2024, “cun 9 por cento de avance”, así como á “precarización de contratos” e a “preocupante falta de diálogo” tanto coa Corporación como con outros colectivos da cidade.
Ademais, Abal denunciou os “graves atrancos” no acceso á vivenda en Santiago e pediu “solucións reais”. Así, o PSOE compostelán reclamou abandonar “as leas partidistas” e que se desbloquee a declaración de mercado residencial tensionado e mobilícense as 6.000 vivendas baleiras que hai na cidade con “incentivos fiscais positivos”.
Así mesmo, os socialistas denunciaron que o servizo de limpeza e recollida de lixo está “a fallar gravemente”, que o novo contrato de transporte público está a xestionarse con “opacidade e que o rural segue sendo “a gran débeda que hai que resolver”.
