O Concello de Santiago iniciou os traballos técnicos necesarios para iniciar a tramitación da declaración do souto da parroquia de Villestro e a contorna natural das parroquias de San Xoán e Santa Cristina de Data como Espazos Naturais de Interese Local (ENIL).
Tal e como trasladou Raxoi nunha nota de prensa, ambos os proxectos forman parte dunha iniciativa municipal centrada na protección, conservación e posta en valor do patrimonio natural do concello, e contan cun investimento conxunto de 15.730 euros (IVE incluído), financiados con cargo á partida de estudos e traballos técnicos da área de Sustentabilidade Ambiental.
O concelleiro de Medio Ambiente, Xesús Domínguez, explicou que “estas actuacións permiten dar os primeiros pasos para protexer legalmente dous espazos de alto valor ecolóxico e paisaxístico, garantindo o seu coidado e promovendo un modelo de convivencia sustentable co medio natural”
Os contratos inclúen a redacción das memorias técnicas motivadas que deben acompañar as solicitudes de declaración ENIL, conforme á Lei 5/2019 do patrimonio natural e da biodiversidade de Galicia, así como ao Decreto 124/2005 que regula esta figura de protección.
Nesta liña, o prazo máximo de execución será de seis meses desde a adxudicación de cada contrato, e a forma de pago establecerase en dúas fases, o 80% na entrega da memoria técnica e o 20% á finalización do proceso de intermediación institucional.
