O Concello de Santiago ven de aprobar a licenza para a construción da nova Facultade de Farmacia, cun orzamento de 16,5 millóns de euros. A infraestrutura, que formará parte da fase I do Centro de Ciencias da Saúde da USC, contará con dous volumes que sumarán unha superficie de 14.463 metros cadrados, segundo explicou a alcaldesa, Goretti Sanmartín.
Na mesma Xunta de Goberno local tamén se deu luz verde á modificación da estación de servizo de Galuresa na avenida do Cruceiro da Coruña, que prevé o derrube e reconstrución do edificio principal coa incorporación dun túnel de lavado. Ademais, adxudicouse a vivenda situada na rúa do Espírito Santo, 33 por 130.639 euros, uns 61.000 por enriba do tipo de licitación, quedando o comprador obrigado a solicitar a licenza en tres meses e iniciar as obras de rehabilitación nun prazo dun ano.
Outro dos puntos aprobados foi o contrato mixto para a iluminación de Nadal, cun orzamento de 576.389 euros para dous anos, así como a contratación do servizo de conserxería, limpeza e vixilancia de instalacións deportivas e centros de ensino, cun investimento máximo de 4,6 millóns. Tamén se puxeron en marcha os trámites para ampliar a rede de abastecemento en Frades, na parroquia da Enfesta, e avanzouse na organización das actividades do Espazo Educativo e de Lecer María Miramontes para o curso 2025-26.
En canto ao estado da limpeza da cidade, Sanmartín recoñeceu deficiencias no servizo e anunciou un expediente á empresa concesionaria, así como unha campaña de concienciación cidadá sobre horarios e lugares de depósito do lixo. A rexedora subliñou que parte da recadación do imposto turístico poderá destinarse a reforzar a limpeza e asegurou que mellorar este servizo é “unha prioridade política de máxima orde”.
