O partido UCIN Galicia alertou este domingo da “grave situación” que atravesa o aeroporto de Santiago-Rosalía de Castro, que a partir do mes de outubro pasará de contar con dez conexións internacionais a manter unicamente tres. A organización, a través do seu coordinador José Luis Calo, atribúe esta perda de destinos á “falta de planificación e compromiso das administracións competentes”.
Segundo explicou Calo, a redución de enlaces supón “un retroceso na conectividade de Galicia” e terá efectos directos en sectores como o turismo, a economía, a captación de investimento estranxeiro e a mobilidade da cidadanía. “A perda de destinos non é froito da casualidade, senón dunha falta de estratexia para protexer rutas fundamentais”, asegurou.
UCIN subliña que a situación afecta tamén á competitividade de Galicia respecto doutras comunidades que “negocian e blindan conexións internacionais”, mentres que no caso galego se perden enlaces considerados clave para a súa proxección exterior.
Entre as consecuencias, o partido destaca unha menor capacidade de atraer visitantes internacionais, con impacto no sector hostaleiro e na economía local; a redución da visibilidade de Galicia como destino de investimento, e a dificultade para estudantes, traballadores e profesionais que dependen das conexións aéreas para a súa actividade.
Calo reclamou tanto á Xunta de Galicia como ao Goberno central que deixen de lado “a pasividade” e actúen “con decisión”. “Non se trata dun luxo, senón dunha necesidade. Manter e ampliar rutas internacionais é apostar polo futuro de Galicia, pola súa economía, a súa cultura e a súa xente”, recalcou.
Finalmente, UCIN Galicia reafirmou o seu compromiso de “seguir denunciando a falta de planificación en infraestruturas e transporte” e de propor medidas para garantir que a comunidade non quede “en desvantaxe fronte a outros territorios”.
