A parroquia de Santa Mariña da Ameixenda, no concello de Ames, comeza este venres 29 de agosto tres días de celebracións pola súa patroa. O campo da festa da localidade acollerá misas, pasarrúas, sesións vermú e verbenas, ademais dun concerto final que terá lugar o domingo 31.
O programa arrinca o venres 29 ás 13:00, cunha misa na honra da Virxe das Dores e de Santa Mariña. A música chegará de seguido coa sesión vermú do grupo Mar de Arousa, que repetirá actuación pola noite xunto coa formación Eureka.
O sábado 30 abrirase cunha misa na honra do Santísimo Sacramento, cantada pola Coral Amigos de Javier Otero e ofrecida pola Familia Vázquez Pérez. Tras a liturxia, o grupo tradicional Requinta da Maía percorrerá as rúas da parroquia, mentres que o trío Manhattan será o encargado da sesión vermú. Pola noite será a quenda de Euphoria, unha formación chegada de Ponferrada, e do propio trío Manhattan. Durante toda a xornada, os máis pequenos poderán desfrutar de inchables instalados no recinto festivo.
O domingo 31 celebrarase unha misa na honra da Virxe do Rosario, ofrecida polas familias Mato e Corral, e acompañada de pasarrúas a cargo de Os Retranqueiros. O trío Arena actuará na sesión vermú. Pola tarde, ás 20:00, terá lugar un dos momentos máis esperados da fin de semana: o concerto de Alana, proxecto integrado por Antía Vázquez, Eloy Vidal e Pablo Castro, que presentará o seu primeiro disco O xeito á cantigha (2024), no que mesturan tradición galega con elementos de música electrónica e pop. Xa pola noite, pecharán as festas cunha nova actuación do trío Arena.
