A sexta edición de Aberto’25, organizada pola asociación Contemporánea, foi presentada este xoves en Santiago cun almorzo informativo no Hotel Compostela. A iniciativa, que comezará o 18 de setembro, reúne a dez galerías de arte contemporánea situadas en Santiago, A Coruña, Vigo, Lugo e Ourense, que abrirán de forma simultánea a súa programación de outono.
A presidenta de Contemporánea, Luisa Pita, salientou que Aberto se consolidou desde a súa primeira edición en 2019 como “unha viaxe de coñecemento e descubrimento a través da arte contemporánea”, e agradeceu o apoio institucional recibido por parte da Consellería de Cultura, a entidade Abanca, a USC a través do Departamento de Historia da Arte, a Escola Mestre Mateo e a Fundación María José Jove, entre outros.
Pita destacou tamén a importancia de que o proxecto sume esforzos con institucións e empresas: “Este tipo de colaboracións son fundamentais para que un evento cultural teña continuidade e poida crecer ano tras ano”.
Pola súa parte, Lucía Suárez, directora da Galería Dupla, explicou que Aberto constitúe “a inauguración conxunta da tempada expositiva” e unha oportunidade para percorrer Galicia “a golpe de arte”. Subliñou que se trata dunha cita para “celebrar o que acontece nas nosas salas e convidar ao público a descubrir novas propostas”.
O programa deste ano inclúe mostras en todas as galerías participantes. En Santiago, a galería Trinta presentará traballos de Alberto Ardid, mentres que Luisa Pita acollerá a proposta Love is Pop do artista Salustiano. Pola súa parte, Dupla presentará obras de Samuel Salcedo e Sito Mújica, e Metro, abrirá cunha mostra de Montse Rego.
As exposicións desenvolveranse entre o 18 e o 21 de setembro, con horarios ampliados e actividades especiais en cada sala. A programación completa poderá consultarse na web de Contemporánea, onde tamén se ofrece un calendario coas distintas localizacións.
Suárez fixo un chamamento ao público a “visitar as galerías, facer a ruta e compartir a experiencia”, concluíndo que “Galicia se ve distinta cando se mira desde a arte”.
