O mes de agosto remata en Ames cunha intensa programación cultural e deportiva impulsada polas distintas concellarías municipais. Esta última semana combinaranse actividades para todos os públicos: concertos, xogos, rutas de sendeirismo e propostas ao aire libre en varias parroquias.
A primeira das citas será este xoves 28 de agosto coa última das andainas do ciclo ‘Camiñando no solpor 2025’, organizada pola Concellaría de Deportes e Promoción da Saúde. A saída será ás 20:00 desde o centro de saúde de Bertamiráns e percorrerá as ribeiras do Sar por Cantalarrana, Sisalde e Agro do Muíño. A actividade é gratuíta e non require inscrición. A concelleira Susana Señorís destacou que estas rutas “dan continuidade ás andainas saudables que se propoñen ao longo do ano e animan a practicar deporte no verán”.
Tamén o xoves 28, a partir das 17:30, terá lugar na praia fluvial de Tapia a derradeira sesión dos Seráns de Ames. A programación inclúe os xogos tradicionais ‘Miudiño’ para nenos e nenas de ata 12 anos e, ás 19:30, un concerto de Mary Iglesias, gañadora do concurso Canta con Ames en 2022. Esta edición dos Seráns levou un total de seis propostas a cinco parroquias distintas, consolidando o obxectivo de descentralizar a oferta cultural no municipio.
A programación de verán pechará o sábado 30 de agosto coa nova edición das ‘Noites en Vela’, organizadas polos concellos de Ames e Negreira. Previstas inicialmente para celebrarse en xullo na Ponte Maceira, tiveron que ser adiadas e trasladadas ao auditorio da Casa da Cultura de Bertamiráns debido á previsión de choiva. Os concertos de As Maianas e Caamaño & Ameixeiras comezarán ás 21:00 e contarán con entrada libre ata completar aforo. Ademais, haberá un autobús gratuíto desde O Milladoiro, con saída ás 20:30.
