A galería de arte da Fundación Araguaney-Puente de Culturas, situada no Hotel Eurostars Araguaney de Santiago de Compostela, abrirá o vindeiro 1 de setembro ás 19:00 a exposición ‘Ecos de terra e ritmo’, da artista coruñesa Lola Saavedra.
A mostra reúne un total de 28 obras, elaboradas en formatos que van desde os 21 x 30 cm ata os 100 x 100 cm. As pezas están realizadas con técnicas diversas —acrílico, técnicas mixtas, acuarela e collage— e mesmo con materiais creados pola propia autora a partir de pigmentos e areas.
A temática percorre elementos como a paisaxe, a música e a danza, sempre desde unha visión persoal que abrangue traballos actuais e outros realizados nos últimos vinte e cinco anos. A exposición poderá visitarse ata o 20 de setembro, en horario de 12:00 a 14:00 e de 17:00 a 21:00.
No seu proceso creativo, Saavedra alterna o traballo planificado con bosquexos coa creación espontánea. “Ás veces parto dunha idea que exploro a través de bosquexos e outras déixome levar polo impulso creativo, sen preparación nin idea previa. A miña obra intenta reflectir esa liberdade e esa conexión coa vida, a través do que me inspira en cada momento”, explicou a autora.
Lola Saavedra (A Coruña, 1965) é licenciada en Belas Artes pola Universidade Complutense de Madrid e profesora de Educación Plástica e Visual en Secundaria. Conta con obra en coleccións da Xunta de Galicia e en fondos privados de España, Italia e Marrocos, ademais de ter realizado murais en centros públicos galegos. Participou tamén en proxectos de arte urbana como as Meninas de Canido (Ferrol, 2017) ou o Ruarte Fest (A Coruña, 2019).
