O Partido Popular de Santiago volveu poñer sobre a mesa os problemas de subministro de auga na zona dos Pexigos, no casco histórico compostelán. O concelleiro Adrián Villa sinalou directamente ao goberno municipal do BNG como responsable da situación, logo de que a pasada semana se rexistrasen ata dous cortes no mesmo día na rúa do Pisón.
Segundo lembrou Villa, os populares xa visitaran este enclave en marzo ante os repetidos cortes, denunciando a situación tanto nos medios como no Pleno municipal, no que tamén interveu a propia veciñanza para reclamar medidas urxentes. Con todo, asegurou que “seis meses despois non se levou a cabo ningún tipo de actuación” que evite a repetición destas avarías.
“Non é de recibo que, en pleno século XXI e no centro de Santiago, as veciñas e veciños sufran continuos cortes de auga motivados pola rotura das tubaxes”, manifestou o edil. Villa criticou que o executivo local se limite a “pequenos arranxos que non son solución de nada”, xa que “un día tapan un burato e ao seguinte rompe uns metros máis alá”.
O concelleiro popular insistiu en que a situación é “caótica e incomprensible” para unha parte da cidadanía que “paga os seus impostos e non pode realizar nin as tarefas máis básicas nos fogares”. Ademais, lembrou que o goberno local leva máis de dous anos de mandato “sen avanzar no novo contrato de xestión do servizo municipal da auga”, que continúa pendente de estudos.
Villa reclamou ao executivo municipal que actúe de maneira inmediata para poñer fin a uns cortes que, segundo o PP, seguen a prexudicar gravemente á veciñanza da zona histórica.
