O WOS Festival x SON Estrella Galicia abriu hoxe a venda de entradas de día para a súa oitava edición, que se celebrará en Santiago de Compostela entre o 11 e o 14 de setembro. A organización tomou esta decisión logo de esgotarse os dous tipos de abonos dispoñibles para todo o festival.
As entradas xa se poden adquirir a través das plataformas dice.fm e ataquilla.com, con ata seis modalidades diferentes que permiten acceder tanto ás xornadas completas como ás programacións nocturnas específicas.
O xoves 11, o festival abrirá cun concerto inaugural protagonizado pola galega Carme López e o dúo catalán Tarta Relena, que presentará en Galicia o seu novo álbum És Pregunta.
O venres 12 ofreceranse dúas opcións: unha entrada de día que inclúe toda a programación ou unha entrada de noite exclusiva para a Sala Capitol, onde se celebrarán catro estreas en España, entre elas a de Carrier e a de Purelink.
O sábado 13 tamén se poderá elixir entre entrada completa ou só nocturna, con acceso ás naves da Fundación Laboral da Construción, antigo espazo industrial recuperado como pista de baile no 2023. Alí actuarán artistas como aya & MFO, Beatrice Dillon, Klein, Objekt ou Lord Spikeheart.
A clausura chegará o domingo 14, cun concerto que reunirá a Grand River & Abul Mogard e a Masayoshi Fujita, ambos en estrea estatal.
O WOS Festival, promovido pola produtora compostelá Work on Sunday, está considerado un dos principais encontros de música electrónica e de vangarda en España, cunha programación multidisciplinar repartida en máis de dez espazos da cidade, desde teatros e igrexas ata clubes.
Recoñecido como Mellor Festival Indoor de Europa en 2018 nos European Festival Awards, o evento conta co patrocinio principal de SON Estrella Galicia e co apoio institucional da Xunta de Galicia, Deputación da Coruña, Concello de Santiago, INAEM e Acción Cultural Española, entre outros.
