A Xunta de Galicia completou as obras da senda peonil e ciclista que conecta a Estación Intermodal de Santiago coa zona administrativa de San Caetano, coa posta en funcionamento do novo paso inferior baixo a SC-20 e das rampas accesibles.
O itinerario dispón agora dunha alternativa máis directa de acceso pola avenida de Rodríguez de Viguri e a avenida de Lugo, a través do carril de servizo que desemboca no paso inferior, polo que poden circular tamén as bicicletas.
A senda, cunha lonxitude de 3,3 quilómetros, supuxo un investimento de 2,4 millóns de euros e permite realizar o traxecto en bicicleta en arredor de 12 minutos. Ao longo do percorrido conéctanse diferentes espazos da cidade como As Brañas do Sar, o barrio de Fontiñas, centros educativos e deportivos, así como áreas comerciais.
Este novo tramo intégrase no Eixo de Mobilidade Sostible de Santiago, que ten como obxectivo unir O Milladoiro coa Intermodal, San Caetano e o Complexo Hospitalario Universitario (CHUS). Unha vez completado, este corredor disporá de 10,5 km de sendas peonís e ciclistas cun investimento global superior aos 11 millóns de euros, financiados pola Xunta con fondos europeos Next Generation.
Segundo destacou o Goberno galego, a actuación busca favorecer os desprazamentos a pé e en bicicleta dentro da cidade, reducir o uso do coche privado e mellorar a mobilidade sustentable en Santiago.
