O deseñador e artesán Álex Regueiro, natural de Santiago de Compostela e veciño de Calo (Teo), presenta a súa candidatura á alcaldía de Teo cun proxecto que mestura compromiso social, recuperación do patrimonio e defensa do rural. Regueiro, cunha traxectoria recoñecida no mundo da moda e da artesanía, propón un modelo de goberno baseado na diversidade, a memoria democrática e a revitalización da cultura tradicional como ferramenta de cohesión social.
Con formación en maxisterio, música, protocolo e moda, e unha carreira consolidada como docente na escola ‘Miranda Priestly’, onde ensina historia da moda, Regueiro é tamén activista LGTBI+ con especial atención ao ámbito rural. O seu obradoiro en Calo é coñecido pola recuperación de traxes antigos e a confección de pezas exclusivas, labor que lle valeu máis de trinta premios. A súa experiencia abrangue tamén a colaboración en programas de radio e televisión, sempre vinculado á promoción da identidade galega e da diversidade.
Entre os eixos principais da súa proposta política destaca a vontade de declarar Teo como lugar de memoria democrática, reivindicando o papel do concello no contexto histórico da comarca. Neste sentido, propón tamén reclamar para Teo o epicentro da tradición dos Xenerais da Ulla, festa que considera parte fundamental do patrimonio inmaterial galego.
No plano social, Regueiro aposta por un Teo inclusivo, onde se erradique a aporofobia, a xenofobia e calquera forma de exclusión ou violencia contra a integridade persoal. Tamén manifesta o seu apoio ao asociacionismo cultural e deportivo, así como á recuperación de espazos de socialización como as tabernas tradicionais, que define como puntos de encontro comunitario a revitalizar.
No ámbito relixioso e territorial, defende o recoñecemento da Unidade Pastoral como instrumento de cohesión, co obxectivo de reunificar as trece parroquias do concello, que na súa opinión se atopan actualmente illadas e sen conexión efectiva.
Crítico coa implantación do proxecto ALTRI e coa actividade da Canteira da Casalonga, Regueiro sitúase claramente na defensa do territorio e do medio ambiente. Para el, a identidade, a sustentabilidade e a xustiza social deben ir da man.
Con esta candidatura, Álex Regueiro preséntase como “un rapaz da aldea que quere facer de Teo un lugar mellor”, resumindo así unha proposta que combina visión global, raíces locais e compromiso persoal coa veciñanza.
