A concellería de Educación do Concello de Santiago continúa a desenvolver o programa municipal Compostela Concilia, unha iniciativa que busca facilitar a conciliación das familias durante os períodos non lectivos. Este ano, o servizo ofrece un total de 674 prazas, distribuídas entre as distintas quendas de vacacións escolares: xuño, xullo, agosto, setembro, Entroido, Semana Santa e Nadal.

As quendas de xuño, xullo e setembro, as máis solicitadas pola veciñanza compostelá, concentran 195 prazas, mentres que en agosto o número de prazas dispoñibles é de 90. O programa desenvólvese nos centros educativos Monte dos Postes e Ramón Cabanillas, onde os nenos e nenas participan en actividades orientadas á natureza, como plantación de sementes, deseños naturais e descubertas do contorno.

A concelleira de Educación, Míriam Louzao, visitou durante esta semana varias sesións do programa e salientou que unha das principais melloras foi a ampliación das prazas de comedor nun 60%, co obxectivo de igualar a oferta de prazas ao número de participantes nas actividades. “Sabemos que o acceso ao comedor era unha demanda social e de xustiza, clave para garantir que moitas nais e pais poidan traballar con tranquilidade, sabendo que os seus fillos están ben atendidos”, indicou.

O Concello destinou 626.000 euros á licitación deste programa para os vindeiros dous anos, dividindo o contrato en dous lotes: un para a atención pedagóxica e monitorado, e outro para os servizos de almorzo e xantar. Segundo explicou Louzao, esta estrutura permite que “cada empresa poida especializarse nas súas competencias e garantir un servizo de máxima calidade”.

Outro dos eixes destacados do programa é a inclusión. O Concello reserva un 3% das prazas adicionais para menores con necesidades específicas, ofrecendo un ou unha profesional de apoio por cada neno ou nena. “É un compromiso firme coa inclusión que marca unha diferenza respecto a etapas anteriores. Garantimos que todos poidan participar nas mesmas condicións, independentemente das súas capacidades”, engadiu a concelleira.

O programa Compostela Concilia insírese nunha liña de actuación municipal que busca equilibrar a vida laboral, persoal e familiar, ao tempo que promove valores educativos, sociais e de respecto á diversidade nos tempos de vacacións escolares. A segunda quenda de xullo foi a máis demandada pola cidadanía, confirmando a acollida positiva dunha proposta que segue medrando en participación e recursos.