A Consellería de Vivenda e Planificación de Infraestruturas vén de dar un novo paso na ampliación do parque público residencial en Ames coa licitación da redacción do proxecto e dirección de obra para 78 vivendas de promoción pública, que se levantarán nunha parcela da rúa Agriños, cedida polo propio Concello.
O anuncio foi publicado na Plataforma de Contratos Públicos de Galicia, cun orzamento de máis de 660.000 euros para a redacción do proxecto básico e de execución, así como para os traballos de dirección facultativa durante a obra. As empresas interesadas poderán presentar as súas ofertas ata o 5 de setembro, e disporán dun prazo de cinco meses para elaborar a documentación técnica requirida.
A actuación será promovida pola Sociedade Pública de Vivenda de Galicia (Vipugal), dependente da Xunta, e contará cun investimento previsto na execución que supera os 14,8 millóns de euros. As vivendas estarán acompañadas de garaxes e trasteiros, distribuídos nunha parcela de 1.725 metros cadrados situada na zona urbana de Ames.
Este proxecto enmárcase na estratexia da Xunta para incrementar a oferta de vivenda protexida nos concellos cunha maior presión residencial, como é o caso de Ames, que forma parte da área metropolitana de Santiago. Segundo informou o Executivo autonómico, o obxectivo é acadar un total de 218 vivendas públicas no municipio, sumando estas 78 unidades ás 140 xa previstas en Galdrachán.
O Concello de Ames cedeu gratuitamente o terreo onde se desenvolverá a nova promoción, nun contexto no que a demanda de vivenda protexida segue a medrar en toda a contorna de Compostela. A colaboración entre administracións busca dar resposta ás dificultades de acceso á vivenda, especialmente entre a poboación máis nova e os fogares con rendas baixas ou medias.
