A concelleira non adscrita, Mercedes Rosón, reclamou este mércores que o goberno local revise e actualice a documentación enviada á Xunta de Galicia para solicitar a declaración da cidade como zona de mercado residencial tensionado, logo de que o Executivo galego rexeitase o informe municipal por considerar que non xustifica de maneira adecuada a existencia dun problema habitacional.
Rosón expresou as súas críticas a través dun chío publicado na rede social X, no que advertiu de que “a Xunta ía poñer paus nas rodas” para impedir a declaración, pero defendeu que, ante esta previsión, o Concello “non pode darlle escusas” ao Goberno autonómico para frear o procedemento.
Sabiamos que a Xunta ía poñer paus nas rodas para impedir a declaración de Santiago como zona de mercado residencial tensionado
Pero ante isto, o que non pode facer o goberno local é darlle escusas ás que o Partido Popular se poida aferrar.
É unha falta de respecto que a Xunta… pic.twitter.com/mWhLH9Go2r
— Mercedes Rosón 🍉 (@mrosonf) August 6, 2025
A concelleira cualificou como unha “falta de respecto” que a administración autonómica, gobernada polo Partido Popular, alegue unha suposta insuficiencia documental. Para apoiar a súa afirmación, recordou que “no 2023, un informe do Observatorio de Vivenda de Galicia, dependente do IGVS”, organismo adscrito á Xunta, xa sinalaba que Santiago era un concello tensionado. Nese documento, asegurou, identificábase que “12 dos 17 códigos postais” da cidade cumprían os requisitos para seren considerados zonas afectadas pola tensión no mercado da vivenda.
A edil tamén fixo referencia ao informe encargado polo Concello á Universidade da Coruña, así como a outros estudos de entidades externas, que segundo indicou avalarían a existencia dun incremento continuo nos prezos dos alugueiros en Compostela. “Calquera persoa que tente buscar un piso no que vivir se pode decatar facilmente”, apuntou.
Rosón lembrou, ademais, que o Partido Popular xa manifestara a súa oposición á Lei estatal polo dereito á vivenda, chegando a anunciar un recurso ante o Tribunal Constitucional, e que a Xunta decidiu aplicar requisitos máis estritos na normativa galega. Tamén evocou o debate plenario municipal de xaneiro de 2024, no que o PP compostelán votou en contra da proposta de declaración como zona tensionada.
Fronte á estratexia de confrontación entre administracións, propuxo “sentarse e dialogar” e comprometeuse a apoiar os pasos necesarios para responder ás demandas técnicas da Xunta. “Pediron un novo informe en xullo? Pois fagámolo. Piden que se reformule o Plan de Medidas Correctoras? Reformulémolo”, afirmou. Segundo a súa interpretación, a prioridade debe ser “deixar sen escusas” ao Goberno galego para “forzar a declaración”.
Rosón concluíu sinalando que o verdadeiro prexuízo desta situación recae sobre a cidadanía. “As que perden son as nosas veciñas e veciños. Non o Partido Popular, nin o BNG“, indicou. A súa mensaxe inclúe unha crítica implícita á dinámica de enfrontamento político entre o PP e o Bloque Nacionalista Galego, formación que lidera o actual goberno local.
A negativa da Xunta a declarar Santiago como zona tensionada supón un novo obstáculo para o Concello á hora de aplicar medidas como a limitación dos prezos do alugueiro ou o incremento de oferta de vivenda pública, nun contexto no que a capital galega presenta unha das rendas medias máis altas no mercado residencial de Galicia.
