O Grupo Municipal Socialista de Santiago de Compostela vén de advertir dunha “situación crítica” no servizo de vixilancia e seguridade da Unidade Municipal de Atención a Drogodependencias (UMAD), derivada —segundo denuncian— da falta de pagamento por parte do Concello e da ausencia de contrato en vigor desde hai meses.
A través dunha declaración pública, a concelleira socialista Marta Abal advertiu que a empresa encargada da prestación deste servizo trasladou recentemente a súa intención de suspender a actividade debido aos impagos reiterados do Goberno municipal, o que deixaría sen cobertura un equipamento que considera “esencial” para a atención especializada de persoas con problemas de drogodependencia.
Segundo explicou Abal, o contrato da vixilancia da UMAD caducou en outubro de 2024 e, desde entón, o executivo local “non adoptou medida algunha para a súa regularización”. A socialista responsabiliza directamente ao Goberno compostelán desta situación, que cualifica de “neglixente”, e asegura que a falta dunha licitación actualizada pon en risco non só o funcionamento do servizo, senón tamén a integridade física e psicolóxica de quen traballa ou recibe atención na unidade.
“A ausencia de contrato no servizo de vixilancia e seguridade da UMAD será un risco inasumible tanto para o persoal traballador como para as persoas usuarias“, afirmou a edil, facendo fincapé na necesidade de actuar “de inmediato” para evitar a paralización da actividade.
Por iso, desde o Grupo Municipal Socialista esixen ao Goberno local que licite urxentemente o novo contrato, introducindo cláusulas que garantan os dereitos laborais das persoas traballadoras do servizo, así como a seguridade do propio centro.
A Unidade Municipal de Atención a Drogodependencias (UMAD), dependente do Concello de Santiago, é un recurso sanitario e social que atende a persoas con adiccións e que require dun contexto seguro para o desenvolvemento da súa actividade asistencial. A posibilidade de que o centro quede sen servizo de vixilancia provocaría, segundo o PSdeG, unha situación de inseguridade incompatible co funcionamento normal da instalación.
A día de hoxe, o Goberno municipal non se pronunciou oficialmente sobre esta denuncia nin sobre os pasos previstos para regularizar o contrato.
