O proceso para que Santiago de Compostela sexa declarada como zona de mercado residencial tensionado, condición que permitiría limitar os prezos do alugueiro na cidade, queda paralizado tras a decisión da Xunta de dar por desistida a solicitude do Concello. O motivo alegado pola Consellería de Vivenda e Planificación de Infraestruturas é que o goberno municipal non deu unha “resposta válida” ao requirimento para completar a documentación presentada.
A resolución, comunicada este martes a través dun escrito oficial da Xunta, implica que o proceso deberá reiniciarse desde o comezo. A administración autonómica indica que o Concello poderá volver presentar a petición, sempre que o faga coa documentación esixida para que “poida ser tramitada adecuadamente”.
A solicitude inicial fora remitida polo goberno municipal o pasado mes de maio, incluíndo un informe técnico co obxectivo de activar os mecanismos previstos pola Lei estatal de vivenda. Con todo, segundo indica o Instituto Galego de Vivenda e Solo (IGVS), o expediente presentado non se axustaba aos requisitos legais. A resposta ao Concello, emitida a comezos de xullo, solicitaba a emenda de diversas deficiencias, en especial no tocante ao plan de medidas correctoras e ao diagnóstico da situación de mercado tensionado.
O executivo local, pola súa banda, mantivo que os informes achegados eran suficientes. Así o defendeu o concelleiro de Urbanismo, Iago Lestegás, nun escrito enviado ao IGVS ao longo do mes de xullo, no que insistía na validez dos datos empregados, aínda que incorporaba algunhas aclaracións.
Porén, a Xunta considera que a resposta do Concello non achegou as modificacións substanciais requiridas. Entre os principais puntos de desacordo, o IGVS sinala a falta de concreción das medidas propostas, que “carecían de incidencia real” ou xa estaban en execución, e a ausencia dun calendario claro de aplicación. Ademais, cuestionan o uso de datos extraídos de portais inmobiliarios como base do diagnóstico —fronte á esixencia de fontes estatísticas oficiais— e reclaman unha xustificación clara da proposta do Concello para considerar “gran posuidor” a quen teña cinco vivendas, e non dez, como recolle a lei estatal.
Tamén se critica desde a Xunta a actitude do executivo compostelán ao non aceptar a proposta dunha reunión técnica entre ambas administracións. Segundo explica o director do IGVS, Heriberto García, houbo contacto previo entre técnicos do organismo autonómico e do Concello, pero a resposta municipal foi “obviar as reunións ofrecidas” e limitarse a unha contestación por escrito que, segundo a Xunta, “non dá resposta ao solicitado”.
A carta remitida por Raxoi o pasado día 23 de xullo limitouse, segundo a versión da Xunta, a rebatir os argumentos do requirimento, sen achegar nova documentación nin modificacións relevantes.
O resultado deste intercambio administrativo é a paralización oficial da solicitude, aínda que a Xunta deixa aberta a porta a que o Concello presente un novo expediente, sempre que cumpra os requisitos formais establecidos.
Este paso atrás contrasta coa situación doutras cidades galegas. De feito, a semana pasada, o Boletín Oficial do Estado (BOE) publicou a resolución do Ministerio de Vivenda pola que se declara A Coruña como zona tensionada, sendo o primeiro municipio galego en acadar esta consideración.
SANMARTÍN ASEGURA QUE O CONCELLO “NON VAI DESISTIR”
A alcaldesa de Santiago, Goretti Sanmartín, respondeu á decisión da Xunta asegurando que “Santiago non desiste nin vai desistir da solicitude de zona de mercado residencial tensionado”. Criticou tamén o feito de que a resposta oficial do Goberno galego chegase antes aos medios de comunicación que ao propio Concello, o que, ao seu xuízo, revela “unha clara intención política”. Para a rexedora, “é evidente que ao Partido Popular non lle interesa que se conteñan os prezos do alugueiro en Santiago”, e acusa á Xunta de reter a declaración ao non poder denegala formalmente, malia que, segundo ela, o Concello “cumpre cos requisitos”. Sanmartín advertiu de que manter a cidade nun “limbo administrativo” supón un prexuízo directo para a veciñanza, que continúa sen protección fronte á subida de prezos no mercado do alugueiro.
GUINARTE PÍDELLE Á ALCALDESA QUE DEIXE DE LADO OS “EGOS INSTITUCIONAIS”
Pola súa banda, o voceiro do Grupo Municipal Socialista, Gumersindo Guinarte, pediu ao goberno local que deixe de lado a confrontación coa Xunta e se centre en facer as modificacións necesarias para sacar adiante a declaración de zona tensionada. “Dende o Grupo Municipal Socialista, pensamos que o goberno da señora Sanmartín debe deixarse de misivas e de correspondencia epistolar coa Xunta de Galicia”, afirmou, incidindo na necesidade de que ambas administracións “se senten a traballar” para culminar o proceso. Guinarte advertiu que os “egos” institucionais non poden primar sobre o dereito á vivenda da cidadanía e puxo como exemplo o caso da Coruña, que “comezou despois e xa obtivo a autorización do goberno central”. Para os socialistas, esta é unha medida clave, demandada desde hai máis dun ano, que debe ser desbloqueada sen atrancos por parte da Xunta. “A vivenda é o problema que máis preocupa aos cidadáns de Santiago”, concluíu, lembrando que esta declaración busca precisamente garantir un acceso real e asequible á vivenda.
