Dúas atraccións instaladas no Milladoiro para as Festas da Madalena foron precintadas este venres tras unha inspección de seguridade encargada polo Concello de Ames á empresa Enmacosa Consultoría Técnica. A revisión tivo lugar o día previo ao inicio das celebracións, co obxectivo de verificar as condicións estruturais e de funcionamento de todas as instalacións de feira presentes na localidade.
O equipo técnico examinou aspectos fundamentais para a seguridade, como a ausencia de aristas cortantes, desniveis sen protección, corrosión relevante ou deficiencias nos cordóns de soldadura. Tamén se supervisou que as atraccións contasen cun asentamento axeitado e que os seus apoios estivesen nivelados correctamente.
Ademais, a inspección incluíu unha revisión dos elementos de protección persoal e colectiva, como cinturóns de seguridade, tensores, cordas e peches, que deben cumprir os requisitos de homologación e mantemento establecidos pola Lei de Espectáculos de Galicia. Non se permite, por exemplo, o uso de sistemas de retención que dependan exclusivamente de mecanismos hidráulicos, pneumáticos ou eléctricos que poidan fallar ante un corte de subministración.
Outro dos aspectos avaliados foi a interacción das atraccións co seu contorno, comprobando que non exista risco de colisión cos tendidos eléctricos, farois, edificios ou outros elementos de mobiliario urbano. Tamén se comprobou a existencia e visibilidade de extintores e outros elementos de seguridade pasiva.
No relativo á estabilidade estrutural, Enmacosa avaliou a fixación de carteis, focos e carcasas decorativas, así como o estado das instalacións eléctricas e a correcta funcionalidade dos sistemas eléctricos e de control. Estes controis lévanse a cabo fundamentalmente a través de inspeccións visuais, sen incluír probas internas de tensión ou análise dos mecanismos ocultos, que son obxecto de revisión técnica periódica similar á ITV.
A empresa subliña que o seu equipo multidisciplinar está composto por especialistas en estruturas, compoñentes mecánicos, sistemas eléctricos e hidráulicos, así como en aplicacións de control, o que permite unha avaliación integral das condicións de seguridade das atraccións.
Unha vez en funcionamento, todas as atraccións deberán exhibir en lugar visible información específica sobre riscos, recomendacións de uso e limitacións de idade ou altura, tal e como recolle a normativa vixente.
A intervención do Concello forma parte dunha política de reforzo das garantías de seguridade durante as festas, para as que se espera unha ampla participación da veciñanza e visitantes durante esta fin de semana no Milladoiro.
