O líder do Partido Popular de Santiago, Borja Verea, realizou unha visita aos barrios de Monte de Deus e Vite para avaliar o seu estado e reunirse coa asociación veciñal da zona. Acompañado polo concelleiro José Ramón de la Fuente, o portavoz popular denunciou o que cualificou como unha situación de “abandono prolongado” e falta de atención por parte do goberno local.
Durante o percorrido, Verea alertou sobre o que definiu como un “notable deterioro”, tanto nas infraestruturas como nos espazos públicos. Segundo afirmou, estes dous barrios representarían unha “zona cero” da desatención municipal, exemplificando unha problemática que, na súa opinión, se repite por toda a cidade.
“Sexa cal sexa o barrio que visitemos —dixo—, a falta de coidado por parte do goberno nacionalista é evidente”, en referencia ao executivo municipal conformado polo BNG e Compostela Aberta. Entre os exemplos que citou, mencionou áreas como Guadalupe, Fontiñas, Sar, A Peregrina, A Barciela, Río Sarela, Vista Alegre, Castiñeiriño, O Pexigo, Meixonfrío, Figueiras ou Laraño, todas elas con “problemas similares”.
En Monte de Deus, o portavoz popular fixo especial fincapé na situación do miradoiro, que describiu como “un dos máis espectaculares da cidade, completamente deixado á súa sorte, sen seguridade nin servizos básicos”. Tamén se referiu á carencia de mantemento nas zonas verdes, aos desperfectos no firme e á falta de canalizacións axeitadas, que, segundo indicou, provocan inundacións recorrentes.
Unha das queixas reiteradas foi a escaseza de colectores de lixo, un problema que, segundo denunciou, leva tempo sendo reclamado pola asociación veciñal sen obter resposta do Concello. “É incrible que a estas alturas non teñan nin contestado”, lamentou.
Verea acusou o goberno local dunha “falla total de capacidade de xestión”, asegurando que “a cidade está paralizada, con servizos básicos que non funcionan e sen atención ás necesidades reais da veciñanza”.
Como remate, comprometeuse a seguir levando estas demandas á axenda pública e esixiu unha intervención urxente e completa en Monte de Deus e Vite, co obxectivo de mellorar a calidade de vida da súa veciñanza e poñer fin ao que cualificou como “un abandono institucional continuado”.
