O concelleiro de Vías e Obras do Concello de Santiago, Xesús Domínguez, visitou este venres as obras de reurbanización da rúa Puente La Reina, onde destacou o bo ritmo dos traballos e anunciou que se aproxima o remate da primeira fase. A intervención abrangue unha superficie de 1.415 m² e supón unha actuación integral que inclúe a mellora dos pavimentos, a renovación das redes de servizos e a reconfiguración dos espazos públicos co obxectivo de facer unha rúa máis accesible e habitable.
Durante a visita, Domínguez estivo acompañado polo encargado da obra, quen lle explicou o estado actual dos traballos. Segundo trasladaron, xa se executaron as actuacións de demolición, completáronse os primeiros tramos das redes de servizos e avanzouse significativamente na colocación dos novos pavimentos. Os próximos pasos inclúen o formigonado da calzada e a colocación do mobiliario urbano, a sinalización viaria e os elementos de xardinería.
Un dos cambios máis salientables será a implantación dunha nova rede separativa de saneamento, substituíndo a rede unitaria preexistente. A obra tamén contempla a renovación da rede de abastecemento de auga, a incorporación dunha nova rede de rega e o soterramento da cablaxe eléctrica e de telecomunicacións. Ademais, está prevista a reubicación dos colectores de lixo.
No tocante á accesibilidade, as novas beirarrúas gañan en anchura e en continuidade, eliminando desniveis e resaltes. As interseccións redeseñáronse para reducir as distancias de cruzamento, e os pasos de peóns serán elevados para mellorar a seguridade viaria.
Outro dos aspectos destacados é o reforzo do verde urbano, coa plantación de novos exemplares arbóreos colocados de maneira máis uniforme e continua. O obxectivo é mellorar a calidade ambiental e o confort da veciñanza nun espazo que aspira a ser máis acolledor e funcional.
Antes do inicio das obras, o concelleiro mantivo unha reunión informativa coa veciñanza da rúa, acompañado por Xan Duro, concelleiro de Mobilidade e Convivencia. Desde o Concello aseguran que durante todo o proceso de execución mantéñense canles abertas de comunicación cos residentes, co fin de responder a calquera incidencia.
A obra foi adxudicada o 24 de marzo á empresa ALCOMTE GALICIA SL cun orzamento de 394.536,54 euros (IVE incluído) e un prazo de execución de cinco meses. Se se mantén o ritmo actual, os traballos estarán rematados a finais do verán ou comezos do outono.
