O PSdeG-PSOE de Santiago de Compostela fixo este luns un balance dos dous anos de lexislatura do presidente Pedro Sánchez, cunha rolda de prensa na que participaron o secretario xeral local, Aitor Bouza; o senador pola provincia da Coruña, Manuel Mirás; e o secretario das Xuventudes Socialistas de Santiago, Iago Carril. Os tres representantes coincidiron en sinalar que “nunca houbo tanta xente traballando neste país” e que as políticas socialistas teñen mellorado de forma directa a vida da cidadanía, tamén en Compostela.
O senador Manuel Mirás subliñou que a actual lexislatura é “probablemente a mellor desde a democracia” en termos de emprego, dereitos e renda. A nivel estatal, destacou a creación de máis de 800.000 empregos e o récord histórico de 22,2 millóns de persoas afiliadas á Seguridade Social, das cales “preto da metade son mulleres”. Tamén sinalou o descenso do paro xuvenil e o aumento do salario mínimo interprofesional nun 60%, así como a mellora das pensións medias na provincia da Coruña, que pasaron de 982 euros en 2018 a 1.359 euros en 2025 no caso das de xubilación, e de 588 a 843 euros nas de viuvez.
Mirás fixo fincapé no ingreso mínimo vital e nos fondos Next Generation, que segundo dixo están “modernizando o país como ningún outro”, así como na recente ampliación dos permisos de maternidade e paternidade, que chegan ata os 32 meses no caso das familias monoparentais. Tamén puxo en valor o crecemento económico español, que cualificou de “superior á media europea”, e o incremento da confianza internacional, cun aumento das investimentos exteriores e mesmo unha revalorización do IBEX 35.
IMPACTO LOCAL EN COMPOSTELA
Pola súa banda, o líder das Xuventudes Socialistas compostelás, Iago Carril, salientou medidas que inciden directamente na mocidade da cidade, como o bono de vivenda de 250 euros, a creación dunha empresa pública de vivenda, e a tarxeta única de transporte, prevista para 2026. Tamén destacou o aumento dun 60% das becas e a “democratización das vacacións” ao facilitar viaxes máis accesibles.
Carril acusou á Xunta de Galicia de “inacción” e criticou que só invista o 30% dos fondos dispoñibles para acceso á vivenda. Fronte a isto, defendeu que o goberno estatal “está a facer os deberes” mentres que “a Xunta pon paus nas rodas”.
CRÍTICA Á PASIVIDADE DO CONCELLO COA ZONA TENSIONADA
Aitor Bouza aproveitou a súa intervención para facer un chamamento ao goberno municipal de Santiago, liderado por Goretti Sanmartín, para que “se poña as pilas” e complete os trámites para a declaración de Santiago como zona tensionada en materia de alugueiro. Bouza puxo como exemplo o caso da Coruña, onde o executivo de Inés Rey logrou a súa aprobación no BOE, a pesar de comezar máis tarde os trámites que en Compostela.
Bouza insistiu en que o Concello “ten que cumprir cos requisitos canto antes” e que “se hai que modificar ou mellorar os informes, que se faga”. Sinalou que esta medida permitiría limitar os prezos do alugueiro nunha cidade afectada pola presión turística e a demanda estudantil.
INFRAESTRUTURAS E VIVENDA PÚBLICA
O secretario local do PSdeG salientou tamén avances en infraestruturas como a posta en funcionamento da Estación Intermodal Daniel Castelao e a gratuidade da AP-9 e AP-53, que conectan Compostela con outras áreas da comunidade. En materia de vivenda, lembrou o compromiso do Goberno co proxecto de vivenda pública en Peleteiro, que será 100% asequible.
Finalmente, Bouza defendeu que “a vida da xente mellorou grazas a un goberno socialista que consolidou dereitos e avanzou en políticas públicas”, ao tempo que asegurou que a prioridade do PSdeG segue sendo “traballar por novos dereitos e solucións que garantan unha maior igualdade”.
O acto serviu así como peche dunha etapa que os socialistas consideran positiva e como pulo á acción futura, con vistas á continuidade da lexislatura ata 2027 e ao impulso de novas medidas que, segundo Bouza, “siguen afondando nos dereitos sociais”.
