O presidente da Xunta, Alfonso Rueda, rexeitou este luns sentirse interpelado polas palabras do arcebispo de Santiago, Francisco José Prieto, quen durante a tradicional Ofrenda ao Apóstolo cualificou como “inaceptable” o uso dos migrantes e refuxiados “como arma política”.
“Dixemos o mesmo de diferentes maneiras“, respondeu Rueda, preguntado en rolda de prensa tras a reunión do Consello da Xunta. O titular do Goberno galego asegurou que leva “moito tempo” reiterando que “os migrantes son persoas” que chegan a Galicia coa esperanza de construír unha vida mellor para eles e as súas familias, e que por tanto cómpre “organización” e evitar “improvisacións nin cálculos políticos”.
No seu argumentario, Rueda volveu criticar o Executivo central pola xestión da acollida dos menores non acompañados, dos que —sinalou— Galicia debe asumir máis de 300, mentres que, segundo os seus datos, “a Cataluña non se lle asigna ningún”. Para o presidente galego, esta situación é unha mostra de “utilización política” e afirmou que o Goberno estatal trata os menores “como pura mercadoría”.
O mandatario popular defendeu que a solución pasa por un control de fronteiras eficaz, para evitar o que cualificou como “efecto chamada”, e por unha regulación ordenada da inmigración que permita tanto respectar a dignidade das persoas migrantes como cubrir necesidades laborais do país: “O que propoñemos é razoable, afastado da pelexa política”, asegurou. “Se ao que se refería o arcebispo é a iso, estou totalmente de acordo”.
COMPETENCIAS PARA PERMISOS DE TRABALLO
Rueda tamén abordou en rolda de prensa a solicitude que a Xunta remitiu ao Goberno central para que Galicia poida autorizar permisos de traballo para persoas migrantes. “A petición acaba de ser enviada“, explicou, e engadiu que comezará a preocuparse se, pasado o verán, segue sen haber resposta por parte do Executivo estatal.
“Agora mesmo non temos ningunha noticia e quero pensar que o Goberno está centrado en cuestións importantes, como esta”, declarou.
O presidente da Xunta expresou o seu desexo de que, a partir de setembro, o Goberno do Estado designará un interlocutor co que poder avanzar nesta transferencia e garantir unha xestión áxil e eficaz da inmigración laboral. Tamén reclamou trato equivalente ao doutras comunidades, como o País Vasco, que segundo indicou “non tiveron problemas” para acceder a esta competencia.
“Estamos a falar dunha necesidade que vai en beneficio de todos“, concluíu Rueda, ao tempo que reiterou a vontade da Xunta de ordenar a inmigración sen instrumentalizar politicamente ás persoas que chegan ao país.
