O presidente da Xunta de Galicia, Alfonso Rueda, protagonizou este xoves 25 de xullo a tradicional Ofrenda ao Apóstolo Santiago como delegado rexio, un acto solemne celebrado no marco da misa do Día de Galicia na Catedral compostelá. No seu discurso, pronunciado diante das principais autoridades políticas e militares da comunidade, Rueda aproveitou para lanzar unha mensaxe de fondo político, na que reclamou ao Apóstolo “inspiración e acerto para quen goberna” nunha España que definiu como “enfrascada na polarización extrema” e “manchada por prácticas impropias de persoas decentes”.
Ante o altar maior da Catedral, o presidente da Xunta solicitou recuperar “a integridade e o respecto á lei”, así como “a credibilidade e a lexitimidade de organizacións e institucións”. Na súa intervención, reiterou a súa preocupación pola situación política e institucional no conxunto do Estado, e pediu ao patrón que guíe os pasos daqueles “que se enfrontan á toma de decisións que repercuten na vida dos demais”.
Rueda tamén fixo unha mención específica a Galicia, invocando ao Apóstolo para que “inspire o camiño dunha terra próspera”, e apelou a construír un futuro baseado na estabilidade e o progreso. O mandatario galego foi o encargado de entregar a ofrenda en nome do rei, seguindo a tradición que se mantén cada 25 de xullo, coincidindo coa festividade do Apóstolo Santiago.
Na Eucaristía, presidida polo arcebispo de Santiago, monseñor Francisco José Prieto, participaron representantes civís e militares de distintas institucións, entre eles o presidente do Parlamento de Galicia, Miguel Anxo Santalices Vieira; o delegado do Goberno, Pedro Branco; e o presidente do Partido Popular, Alberto Núñez Feijóo.
A alcaldesa de Santiago, Goretti Sanmartín, acudiu previamente ao acto de saúdo ás autoridades na Praza do Obradoiro, momento no que recibiu os distintos representantes institucionais que participaron na cerimonia relixiosa.
O acto da Ofrenda ao Apóstolo, que mestura simbolismo relixioso e proxección política, mantén a súa relevancia institucional no calendario oficial galego. Nesta ocasión, o discurso do presidente da Xunta reforzou o ton reivindicativo das últimas edicións, facendo fincapé na situación do Estado e na necesidade de recuperar valores que, segundo dixo, se están perdendo na vida pública.
