O Consorcio de Santiago de Compostela reuniu este xoves, véspera do 25 de xullo, a súa comisión executiva e o seu consello de administración, presidido pola alcaldesa da cidade, Goretti Sanmartín, e no que tamén participaron as administracións autonómica e estatal.
Por parte da Xunta, asistiu o conselleiro de Cultura, Lingua e Xuventude, José López Campos, quen prometeu que para 2026 a achega autonómica ao Consorcio manterase conforme á senda acordada en 2023, que contempla un incremento de 300.000 euros entre 2024 e 2026.
Durante o transcurso desta reunión, aprobáronse as contas anuais do organismo correspondentes a 2024, así como o orzamento necesario para restaurar o hórreo da leira de Vista Alegre, por 17.165,52 euros.
Ademais, informouse sobre as bases reguladoras da subvención do Consorcio ao Concello de Santiago para o mantemento e reparación dos pavimentos da cidade histórica nos exercicios de 2025, 2026 e 2027, o que permitirá investir uns 405.000 euros na conservación e mantemento dos seus lousados e dar así continuidade ao programa ‘A Pedra que Pisas’.
Así mesmo, entre outros asuntos administrativos, a reunión aprobou a programación do curso 2025-2026 da Escola de Altos Estudos Musicais (EAEM), que comezará no outono.
Á parte de Sanmartín e López Campos, participaron no encontro o subsecretario do Ministerio de Transportes e Mobilidade Sustentable, Rafael Guerra Posadas; o inspector xeral do Ministerio de Facenda, Ángel Esteban Paul; o secretario xeral técnico da Consellería de Educación, Universidades e Formación Profesional, Manuel Vila; a secretaria xeral técnica da Consellería de Cultura, Elvira Casal; a primeira tenente de alcaldesa, María Rozas, e os concelleiros Borja Verea (PP) e Sindo Guinarte (PSOE). Tamén asistiron o secretario do Consorcio, José Manuel González García, e o xerente, José Antonio Domínguez Varela.
