A SD Compostela incorpora un novo reforzo para a súa portería de cara á tempada 2025/26. Trátase de Roi Graumann López, un porteiro vigués de 20 anos que asina co club santiagués por unha campaña e ocupará ficha sub-23.
Formado nas categorías inferiores do RC Celta, Graumann deu os seus primeiros pasos destacados no fútbol base ata chegar á Liga Nacional xuvenil. Posteriormente, defendeu as cores do UD Val Miñor, equipo co que logrou o ascenso á División de Honra, categoría na que competiu no seu último ano como xuvenil.
No seu primeiro curso como sénior, o gardameta defendeu a portería do Pontevedra B, equipo de Preferente Galicia, onde disputou 22 encontros de Liga como titular e mantivo a portería a cero en 6 ocasións. O seu rendemento contribuíu a que o filial granate rematase a tempada nunha digna novena posición.
A chegada de Graumann ao cadro que adestra a SD Compostela no Estadio Vero Boquete responde á intención do club de apostar por talento novo con proxección. O porteiro súmase ao proxecto cunha clara vontade de medrar e coa determinación de traballar para acadar o obxectivo do ascenso.
Con esta fichaxe, o equipo compostelán continúa perfilando o seu persoal para afrontar unha nova campaña con aspiracións e renovar o seu compromiso coa xuventude e a proxección de xogadores galegos.
