O Concello de Brión e a empresa concesionaria do servizo de augas, Espina & Delfín, veñen de activar a campaña informativa ‘A auga é vida. Aprovéitaa’ co obxectivo de promover hábitos de consumo responsables entre a veciñanza. A iniciativa chega nun contexto de elevadas temperaturas e escaseza de precipitacións, que afectan negativamente aos caudais ecolóxicos dos ríos e fan necesario preservar as reservas de auga potable.
Durante o ano 2024, os consumos no municipio acadaron os 731.418 metros cúbicos, cunha media mensual de 60.951 m³. Porén, as cifras experimentan un notable incremento nos meses de verán: só en agosto consumíronse 77.762 m³ fronte aos 43.212 rexistrados en febreiro. Isto supón un aumento do 44 % no consumo estival, precisamente cando os recursos hídricos se atopan máis tensionados.
A campaña pon o foco na sensibilización da poboación sobre a necesidade de adoptar pequenos xestos diarios que poden ter un impacto significativo no aforro de auga. Entre as recomendacións destacan pechar a billa ao enxaboar os pratos, optar por duchas en vez de baños, evitar tirar aceite ou residuos polo vertedoiro ou o inodoro, e empregar electrodomésticos como a lavadora ou o lavalouzas só cando estean a carga completa.
Tamén se suxire moderar o rego de xardíns, o lavado de vehículos e o enchido de piscinas, así como pechar a chave de paso da auga en caso de ausencias prolongadas, como as vacacións estivais.
A difusión da campaña realizarase a través de carteis nos edificios municipais e instalacións do servizo de augas, ademais das redes sociais e páxinas web do Concello e da empresa concesionaria. Desde ambas entidades fan un chamamento á cidadanía para implicarse activamente na protección dun recurso esencial cada vez máis ameazado polo cambio climático.
