A taxa turística empezará a recadarse en Santiago, finalmente, a partir do 1 outubro e non desde agosto, como prevía o Concello inicialmente. Así o anunciou este venres a concelleira de Turismo, Míriam Louzao, tras indicar o mércores que se abría a “flexibilizar” a entrada en vigor.
Nun encontro aberto aos encargados do cobro deste tributo, o sector hostaleiro mostrou a súa oposición á súa posta en marcha en agosto, xa que este e setembro son os meses de máis traballo para estes profesionais.
Segundo apuntaron varios dos asistentes nas súas intervencións, as reservas xa pagas e un menor persoal eran as súas principais preocupacións á hora de afrontar esta nova obrigación.
A ordenanza da taxa turística aínda ten que recibir a súa aprobación definitiva no pleno municipal deste mes, que se celebrará o xoves 31 de xullo. Deste xeito, Compostela converteríase no primeiro concello galego en instaurala.
