O portavoz do PSdeG de Santiago, Gumersindo Guinarte, pediu ao Goberno local “reconsiderar” a intención de poñer en marcha a taxa turística no mes de agosto e chamouno a dialogar co sector. O Consistorio espera dar a súa aprobación final á implantación deste imposto no pleno deste mes para poder empezar a recadalo a partir do seguinte.
Segundo un audio remitido aos medios, Guinarte opina que agosto non é o mes “máis adecuado” debido a que é o de “máis alta ocupación” e polo “pouco tempo” co que os establecementos contan para adaptarse ao sistema. O PSdeG local pediu que “dialogue co sector”, o que, segundo a formación, “tiña que facer hai xa meses”. “Xa advertimos, mesmo no pleno municipal, que o Goberno da señora Sanmartín non estaba a manter o diálogo necesario co sector para a implantación da taxa turística”, expresou Guinarte.
Estas declaracións prodúcense a horas de que o Concello se reúna cos establecementos implicados para explicar o funcionamento da recadación do imposto. “Confirmamos aqueles temores que tiñamos porque, a 15 días de inicio do mes de agosto, o Goberno municipal vai reunirse co sector para cuestións prácticas da posta en marcha deste tributo”, criticou Guinarte.
