O presidente da Xunta, Alfonso Rueda, reprochou ao Concello de Santiago que achegase “datos dun portal inmobiliario” na solicitude de zona de mercado residencial tensionado. A preguntas dos medios este martes despois de coñecerse a pasada semana que a Administración autonómica requirise ao Goberno local que “enmiende deficiencias” na documentación que enviou a finais de maio para solicitar esta declaración, Rueda dixo que é “pouco serio” que os datos achegados “baséanse” en “un portal inmobiliario”.

Neste sentido, manifestou que hai “fontes oficiais” que, reivindicou, “son as que ademais a normativa sobre vivenda que ampara esta declaración di que teñen que ter este carácter”. “O Concello da Coruña fixo así”, dixo antes de insistir en que o concello da capital galega debe “darse conta” de que para tomar este tipo de decisións “hai que cumprir a lei”.

De cumprila, asegurou, a Xunta fará efectiva esta declaración a pesar de “non crer nesta medida” que “non resolveu ningún problema onde se instalou”. “Pero se un Concello quere facela efectiva, como xa fixo A Coruña, a Xunta non se vai a opor. Estamos á espera do BOE, xa non depende de nós, pero a Xunta autorizou esa declaración de zona tensionada porque o Concello da Coruña mandou a documentación en regra e obtivo esa declaración”, aseverou.