Decenas de traballadores do servizo de limpeza dos hospitais Clínico e Gil Casares de Santiago concentráronse este venres ante a Consellería de Sanidade, en San Lázaro, para pedir a rescisión do contrato a Ilunion, UTE concesionaria do servizo, polos seus “reiterados incumprimentos“.
Segundo informa a CIG, durante a protesta, o comité rexistrou un escrito dirixido ao conselleiro de Sanidade, Antonio Gómez Caamaño, para reclamarlle, igual que fixo directamente coa Xerencia do CHUS, que finalice co seu vínculo porque infrinxe a lei de contratos do sector público.
Tal e como explicou Anxo Noceda, representante do sindicato nacionalista, os “reiterados incumprimentos” teñen que ver coa falta de cobertura de vacantes e o exceso de carga de traballo, principalmente.
Ademais, Noceda denunciou que este mesmo venres o comité coñeceu “un novo incumprimento”, xa que a empresa “comunicou a negativa a aplicar a subida salarial do 0,5 por cento para o persoal público“, algo ao que os traballadores de contrátalas do Sergas “tamén teñen dereito”. Por todo iso, esixiu unha actuación urxente da Administración galega e avanzou que, se non se adoptan medidas, o persoal intensificará as súas protestas en próximas semanas.
