O voceiro do Partido Popular de Santiago, Borja Verea, defendeu este xoves o voto en contra da súa formación ao pagamento de dúas facturas pendentes polo alugueiro de autobuses urbanos, que foron rexeitadas no último pleno municipal. Fíxoo mediante declaracións nas que acusa directamente ao Goberno local, presidido por Goretti Sanmartín, de ter aprobado en 2023 unha contratación “a dedo” sen os procedementos legais esixidos.
“Se non é quen de aprobar as súas propias facturas, non pode botarlle a culpa aos demais”, afirmou Verea, quen tamén é deputado no Parlamento de Galicia. O popular asegurou que o rexeitamento das facturas non responde a un criterio político, senón a razóns xurídicas, técnicas e éticas.
Segundo relatou, a decisión da Xunta de Goberno Local de setembro de 2023 adoptouse “sen procedemento administrativo ningún, sen informe independente e vulnerando toda a normativa de contratación”, adxudicando directamente un contrato millonario para o servizo de alugueiro de autobuses, supostamente sen fixar un prazo límite. “Pódese alegar emerxencia para un momento puntual, pero non hai emerxencia que dure 2, 4, 5 ou 6 anos”, engadiu.
Verea afirmou que o seu grupo xa advertira daquela da existencia de irregularidades e preguntou se o executivo municipal realizou desde entón algunha corrección ou auditoría interna. Para o líder popular, manter esta contratación sen reformular o proceso ou buscar alternativas supón unha grave responsabilidade política.
“Eu non podo aprobar no Pleno un expediente nestas condicións”, sostivo, e recalcou que un contrato de tal envergadura non pode ser adxudicado sen concurso público. Na súa intervención, tamén apuntou que os informes de Intervención municipal cualifican a situación de “auténtica barbaridade” e non poden certificar que os pagos se axusten aos prezos reais do servizo recibido.
Finalmente, Borja Verea afirmou que a súa intención é “poñer sobre a mesa e traer á axenda pública” un asunto que, ao seu xuízo, compromete a transparencia e a correcta xestión dos recursos públicos en Santiago de Compostela. Considera que a actuación do Goberno local neste ámbito está a afectar tanto á legalidade como ao funcionamento dun servizo esencial para a cidadanía.
