O conselleiro de Presidencia, Deporte e Xustiza, Diego Calvo, reprochou ao Goberno central “falta de lealdade institucional” por fixar a data do acto de inauguración da Estación Intermodal de Santiago –que se produciu este mércores– “sen ter en conta ás tres administracións” que a financian, entre as que se inclúe a propia Xunta, ademais do Estado e o Concello.
En declaracións aos medios, o responsable autonómico asegurou que a Xunta coñeceu a data fixada para o evento a través da prensa, que transcendeu o mércores anterior. Segundo a versión de Calvo, foi o sábado pola tarde cando recibiron a invitación oficial para a mesma.
“Dixemos que estas non eran formas de actuar nunha infraestrutura que financiamos tres administracións, aínda que esa parte non sexa exacta”, subliñou o conselleiro, que afirmou que pediron explicacións ao presidente de Adif, quen remitía a carta. “Con todo, déronnos escusas e tiraron para diante”, continuou.
Desta forma, recriminou ao Goberno central fixar esta data en coincidencia coa sesión de control ao presidente autonómico, Alfonso Rueda. “Non nos parece normal fixar unha data sen ter en conta ás tres administracións e, sobre todo, fixar unha data no día e hora na que saben perfectamente que o Goberno galego está a contestar as preguntas dos grupos de oposición“, criticou Calvo. O conselleiro asegurou que, con este xesto, “cambia moito” a relación entre Xunta e Goberno estatal. “Supoño que o que buscarán é unha foto con interese partidista”, engadiu.
