O reitor da Universidade de Santiago de Compostela (USC), Antonio López, asegurou que non se pode “pedir facer, a través da opinión pública, un debate razoado”, ante o respaldo do presidente da Deputación da Coruña, Valentín González Formoso, á creación dunha Facultade de Medicina na cidade herculina. Por iso, opina que, dentro desta discusión, hai “moitos matices”. O 9 de xuño, Formoso defendeu a implantación dunha Facultade de Medicina na capital provincial. “Hai unha demanda da sociedade de maior ampliación do persoal de médicos que agora se desatende”, sinalou.
Preguntado este martes en declaracións aos medios a este respecto, o reitor da USC indicou que “calquera tema ten moitos puntos de vista”: “Cada un mírao desde o punto que lle toca máis preto”. “Tampouco podemos pedir facer, a través da opinión pública, un debate razoado de cousas. Habería moitos matices que facer e seguramente, se llos contamos a calquera, matice a súa posición”, continuou, en referencia ás declaracións realizadas polo presidente da Deputación.
Por exemplo, en canto ao número de alumnos inscritos, López insistiu en que o número de prazas depende da “aída que teñen os alumnos a continuación”, así como das “necesidades” que van existir en 2037, ano no que se incorporarán ao mercado laboral os estudantes que comecen o grao o próximo curso. “Ás veces utilízase: ‘Xa que hai tanta demanda, pois ofrecemos máis prazas’. Non é tan lineal”, expuxo. Este é un dos argumentos que, precisamente, esgrimiu González Formoso na súa exposición.
POSICIÓN DA ALCALDESA DE SANTIAGO
As declaracións do presidente da Deputación debateranse este xoves no próximo pleno municipal, en tanto que os concelleiros non adscritos –exedís do PSOE, partido ao que pertence Formoso– solicitaron a súa reprobación. Preguntada a este respecto, a alcaldesa de Santiago, Goretti Sanmartín, reafirmouse na declaración institucional asinada de forma unánime pola corporación municipal no anterior pleno, coa que mostrou o seu rexeitamento á creación dunha nova Facultade de Medicina.
“No Sistema Universitario Galego (SUG), todo o mundo ten que entender que a facultade de referencia é a Facultade de Medicina”, aseverou a rexedora. Así mesmo, asumiu como “lóxico” avanzar no acordo para buscar a descentralización do grao, como se acordou en 2015. “Ese é o marco no que nos temos que mover”, engadiu Sanmartín, que convidou a un “debate obxectivo e sosegado”. “Aínda que haxa xente que poida ter outras valoracións”, contrapuxo.
GRUPO DE TRABALLO
Por outra banda, a sede do Reitorado da Universidade da Coruña (UDC) acolleu este luns a primeira reunión do grupo de traballo para a descentralización do Grao de Medicina, á que asistiron os reitores do tres universidades galegas, Ricardo Cao (UDC), Manuel Reigosa (UVigo) e Antonio López (USC). Segundo trasladou o último, a reunión serviu para constituír o grupo, fixar un calendario e unhas normas mínimas de funcionamento. A previsión é que, antes de setembro, se produzan outras tres reunións, nas que comezarán a traballar no propósito. Ademais, indicou que o reitor da Coruña mantén a súa posición inicial, en canto á súa intención de crear unha Facultade de Medicina na cidade herculina. “Loxicamente o que hai que pensar é que, se imos falar e tratar de buscar acordos, calquera acordo debe estar orientado a que, se o hai, se pare a iniciativa de nova Facultade de Medicina”, expuxo.
