InicioSANTIAGOO Concello de Santiago e a USC selan un convenio coas Cidades...

O Concello de Santiago e a USC selan un convenio coas Cidades Patrimonio para promover accións culturais e científicas

A iniciativa impulsada por Goretti Sanmartín como presidenta do Grupo busca consolidar unha rede de colaboración entre as universidades e as cidades Patrimonio da Humanidade

Publicado o

Por David M. Sobrino Platas

O Concello de Santiago de Compostela e a Universidade de Santiago (USC) veñen de asinar un convenio marco de colaboración co Grupo de Cidades Patrimonio da Humanidade e coas universidades que teñen sede nas 15 cidades que o compoñen. O acordo, segundo explicou a alcaldesa compostelá e presidenta do Grupo, Goretti Sanmartín, pretende abrir unha nova etapa de cooperación institucional para o desenvolvemento de actividades culturais, deportivas e científicas que contribúan á promoción e preservación do patrimonio histórico.

“É unha oportunidade para que as universidades acheguen coñecemento ao grupo e, ao tempo, para que as cidades contribúan a visibilizar a actividade académica e investigadora”, sinalou Sanmartín trala sinatura. Entre as áreas prioritarias destacan a investigación sobre sustentabilidade, a transformación do modelo turístico ou a realización de xornadas e cursos en colaboración co tecido universitario.

O reitor da USC, Antonio López, incidiu na dimensión formativa do convenio e puxo como exemplo o mestrado que xa se desenvolve en Santiago sobre patrimonio cultural dixital. “Sería positivo estendelo a outras universidades do grupo, que reúne institucións tan significativas como as de Salamanca, Alcalá ou Córdoba”, apuntou. Engadiu que se trata dun proxecto con vocación de permanencia que “permitirá crear redes culturais e científicas entre cidades con importantes bens patrimoniais”.

Ademais das accións comúns, cada cidade poderá negociar convenios específicos coa súa universidade de referencia, axustando as liñas de traballo ao seu contexto local. A iniciativa, segundo o reitor, tivo unha “excelente acollida” tanto entre os gobernos locais como nas institucións académicas. “O entusiasmo foi unánime. Mesmo outras universidades con bens patrimoniais, como Granada, mostraron interese por sumarse”, asegurou.

No caso concreto de Santiago, o convenio tamén busca impulsar o turismo vinculado á ciencia e á educación, fomentando a chegada de congresos, estadías de investigación e mobilidades académicas. A rexedora destacou que o obxectivo é aproveitar o potencial da comunidade universitaria como medio de difusión do patrimonio e da identidade das cidades.

Durante a comparecencia tamén se abordaron cuestións de actualidade vinculadas á USC, como a situación do mestrado de Matemáticas, que foi rexeitado pola Xunta por non acadar o número mínimo de estudantes. López confirmou que a universidade recorreu a decisión e traballa xa nun novo programa, con vistas ao curso 2026-2027, aínda que agardan poder manter unha versión transitoria para o curso anterior.

Outro dos temas tratados foi a proposta dunha nova facultade de Medicina, respecto da cal o reitor fixo un chamamento a “avaliar con serenidade o modelo que mellor garanta a formación do estudantado”. Defendeu manter a estrutura actual, aproveitando todos os recursos do sistema sanitario galego, e advertiu do risco de crear novas facultades sen garantir a formación especializada obrigatoria tras o grao.

Pola súa banda, a alcaldesa reiterou o posicionamento da corporación compostelá en defensa da facultade de referencia na cidade. “É unha posición unánime e racional: Santiago debe seguir sendo o referente no ámbito da Medicina no sistema universitario galego”, afirmou. Considera fundamental manter os acordos de descentralización acadados no seu momento, apostando por un modelo con visión sistémica e non localista.

Tanto reitor como alcaldesa insistiron na necesidade dun debate sereno e informado sobre o futuro da formación médica en Galicia, centrado nas necesidades do sistema sanitario e non só na demanda social inmediata. Coincidiron en que calquera decisión debe orientarse a garantir unha formación de calidade, coordinada cos hospitais públicos e sustentada nun modelo universitario coherente coas previsións a longo prazo.

ÚLTIMAS

Cando o verde non chega: semáforos que tardan en cambiar e peóns que prefiren non agardar

Os tempos de espera nos semáforos de Santiago están a xerar un número crecente...

Adxudicada á empresa OHLA a construción do futuro edificio de Farmacia da USC

A Universidade de Santiago de Compostela (USC) adxudicou a construción do futuro edificio que albergará a...

Rueda celebra o 90 aniversario do Aeródromo Militar de Santiago

O presidente da Xunta, Alfonso Rueda, participou este sábado na Xornada de portas abertas...

Ferida leve unha condutora en Teo ao tentar evitar a caída por unha pendente do seu coche

Unha condutora resultou ferida de forma leve tras tentar parar a caída do seu...

Cando o verde non chega: semáforos que tardan en cambiar e peóns que prefiren non agardar

Os tempos de espera nos semáforos de Santiago están a xerar un número crecente...

A Xunta e a USC pactan reformular o Máster en Matemáticas e retomar a súa oferta en 2026-27

A Xunta informou "favorablemente" a proposta do novo Máster en Matemáticas da Universidade de...

O PSdeG de Santiago pide “reconsiderar” a taxa turística en agosto, que non é o mes “máis adecuado”

O portavoz do PSdeG de Santiago, Gumersindo Guinarte, pediu ao Goberno local "reconsiderar" a...

LEAVE A REPLY

Please enter your comment!
Please enter your name here